Vawiin chawhnu dar 2:00Pm khan Siaha District Treasury office Building thar cheng nuai Rs.113.56/- senga sak chu District Bawrhsap Pi Harleen Kaur IAS in a hawng.

He  DTO building thar hawnna inkhawm hi Pu Sailoliana Sailo, MFAS, Jt.Director Accounts & Treasury , Southern Zone ,Lunglei in  a kaihruai.

Building thar hawngtu khuallian Pi Harleen-i  chuan Mizoram District  Treasury Office te zinga tha ber a chhal ngam hial tur hawn theiha  a awm leh hawngtu ka ni hi ka lawm tak zet a ni, a ti. Siaha District in Treasury Office building tha tak kan lo nei ta hi Siaha district mipui te leh a bik takin Siaha District Treasury Office staff te ka lawmpui tak zet che u a. He kan District  Treasury Building thar hian Treasury Office staff ten  Siaha district mipui te rawng an bawlna kawngah phurna leh chona thar pe se. Mipui te pawhin kan district a building thar kan nei te hi kan district  roh a ni ti hria a,  dimdawi taka enkawl  leh vawn thianghlim hi kan mawhphurhna a ni ti i hre thar leh ang u, a ti bawk.

Pu Vanlalsawma MFAS, Director (LFA), Accounts & Tresury pawhin thu sawiin, kum 5( 2001-2005) lai Treasury Officer hnathawka a lo awm tawhna hmunah ngei building thar a han ding luah mai chu ropui a tiin, Siaha District mipui te leh Treasury Office staff te a lawmpui tak zet a ni, a ti. Pu Vanlalsawma hian Treasury Office kalphung leh  hnathawh tlangpui te mipui kalkhawm te hnenah a  sawi bawk.

Pu Lalengmawia, SDO, PWD Building Sub-Div ,Siaha in technical report peiin, District TO building thar hi zopa chhiar a chhawng 3 a ni a. Ground floor hi 67.31Sqm a zau a ni a, 1st Floor hi 218.28 sqm niin 2nd Floor hi 114.73 Sqm a ni.

 A building pumpui zau zawng hi 400.32 sqm a ni. Room 16 awmin, Toilet -6 a awm bawk.

A building sak hna hi contractor Pu C.Seihmo, College vaih in a thawk a, ni 15.8.2015 a sa tanin, ni 10.11.2017 khan sak zawh a ni.