1790/2025-2026

Siaha the 22nd August 2025: District Working Committee on Celebration of Teachers’ Day te chuan vawiin khan DC Mini Conference Hall, Siaha-ah SDO (S) Pu Vanlalchhuanliana kaihhruaiin kumin Teachers’ Day lawm dan tur relin an thukhawm.

Thutkhawm kaihruaitu Pu Vanlalchhuanliana, SDO (S) chuan kalkhawmte chu chibai bukin zirtirtute hlutna leh pawimawhna hre thar leh theuhin , kumin an Ni puala hun hman tur pawh a tha thei ang bera hman a nih theih nan ngaihtuahna seng theuh turin a sawm. Teachers’ Day lawmnaah Naupangte zingah faina chungchang sawi uar lehzual turin kalkhawmte a ngen a, Kum hmasa lamah Mizoram pum Khawpui fai inelnaah Siaha District in pahnihna lawmman a la tawh a, kuminah pakhatna lawmman dawn an tum tlat tiin theihtawp chhuahpui turin a ngen a ni.

 Pi Jenny Lalthanpuii, Head Assistant, DEO Office chuan kum hmasa lama Teachers’ Day lawm dan report tawi a pe a, chawhma lamah mahni school theuhah lawm niin chawhnu lamah erawh zirtirtuten a huhovin MYA Multipurpose Hall, New Siaha-ah lawmna hun an hmang tih a tarlang a, Siaha District atanga District, State leh National level a teacher Awardee-te chawimawina hun hman a nih bawk thu a tarlang a ni.

Vawiin Meeting chuan kumin Teachers’ Day chu zirlaiten mahni zirtirtute chawimawina Ni a nih angin duhthawh takin mahni school theuhah lawm nise an ti a, school a chhiar chhuah tur Dr S Radhakrishnan chanchin chu DEO lam atanga pekchhuah turin ruahmanna an siam a ni. Kumin Teachers’ Day vawi 64na lawmna turah hian zirtirtute chawimawi nan District Beautification Committee te ruahmannain Traffic Point, Siaha Bazara LED Big Screen ah Teachers’ Day pual thuziak nilenga phochhuah nise an ti a, chu bakah Khawpui chhunga hmun langsar zual ah Teachers’ Day pualin banner tar nise an ti bawk a ni. Heng bakah hian National Foundation for Teachers’ Welfare (NFTW) Fund chungchangte pawh sawiho a ni bawk a hi.

 Vawiin thutkhawmah hian Addl SP, Sr CMO, te bakah MADC atangin Sr EO - M/S & P/S , ADPC , Samagra te leh  pawl hrang hrang aiawhte an kalkhawm a ni.