Vawiin chawhma dar 11:00Am khan District Bawrhsap Pi Harleen Kaur IAS Office Chamber-ah Inner Line Permit (ILP) chungchangah Tlawmngai Pawl, Media te leh District chhunga ILP buaipuitu Official te nen meeting an nei a. He meeting hi Bawrhsap Pi Harleen Kaur IAS in a kaihruaia, meeiting-ah hian Siaha District chhunga hnam dang ILP nei lo leh an ILP thi tawh Renew ngaihsak lem lo tam tak an awm chungchangte sawi ho a nih bakah, Pu Ngurthansanga, SDC leh Pi Laldinfeli, SDC ten Tlawmngai Pawl aiawhte leh Media kalkhawm te chu ILP chungchang hriattur tul leh pawimawhte zirtirna hun an hmang bawk.

Vawiin meeting-ah hian Temporary leh Regular ILP chungchangte, Temporary Stay Permit chungchangte, ILP lo Sponsor tu hriattur leh tihtur te, tute nge ILP nei tul lo/ mamawh lo tih chipchiar taka zirho a ni.

Karleh atang khian DC Office leh SP Office tangkawp te chuan ILP neilo te leh ILP thi tawh kawlte zawnchhuah hna ngawrh takin an thawk tan dawn a. Chuvangin, ILP Holder te leh Sponsor ten ILP chungchanga tihtur tul chu tunkar chhung hian intihfelna hun an la nei a. Check hunah ILP chungchanga man te reng reng chu dan angin an chungah rorelsak an ni ang.

ILP thi tawh kawl an man te reng reng, a Sponsor tu in Mizoram pawnah an thawn chhuahna tur senso atum vek bakah, an mi sponsor mi pakhat atan Rs. 1000/-(Private Work) emaw Rs. 2000/- (for Govt. Work) a fine bawk ang a, kum hnih chhung ILP sponsor phalhsak an ni bawk lovang. Vawiin meeting-ah hian Pu SD MIsra IPS, SP, Siaha District pawh tel ve in, Pi Harleen Kaur IAS, DC nen ILP chungchangah Siaha District chhung mipuite bakah, Tlawmngai Pawl hrang hrangte, VC te, Media te leh Kohhran hrang hrang te tawiawmna leh thawhpuina an ngen bawk a ni.