Vawiin khan Vairengte Community Hall-ah Mizo Student Union, Vairengte headquarter buatsaihin kumina HSLC leh HSSLC pass thar te lawmpuina hun leh  Vairengte tihmingthatu te  chawimawina hun hman a ni a; Bialtu MLA Pu K.Lalrinthanga, Parliamentary Secretary chuan a hmanpui.

Vairengte khua atanga HSLC leh HSSLC pass tharte lawmpuina hun hmannaah hian Pu K.Lalrinthanga chuan Zirlai pass thar te lawmpuina thu sawiin, an taimak rah seng theia an awm chu chhuanawm a tih thu a sawi a. Amaherawhchu, bul tan chauh an ni tih in hria a, zirna sang zawk ban pha zel tura taimak chhunzawm zel turin a fuih a ni. Sorkarin quality education a kalpui mekah khawtlang nu leh pa te leh MSU leh MZP te chu sorkar tawiawm turin a sawm a. Zirtirtu lakah zirtirtu lakna tur a khaw mi ngei an awm thei nan tang sauh sauh turin kalkhawmte a sawm a ni.

Zirlai pass thar te hi mi 120 niin, Vairengte khaw tihmingthatu chawimawi te hi mi 5 an ni. Zirlai pass thar te leh Vairengte khaw tihmingthatu te hnenah thuziak hlan a ni.

Pu K.Lalrinthanga hian vawiin vek khan Govt.T.Robert High School, Bilkhawthlir tlawhin, thawktute leh zirlaite dinhmun bakah school dinhmun a en a. Govt. T Robert High School hian headmaster an neih loh avanga harsatna an neih te Bialtu MLA hnenah hian an lo thlen a. Tun dinhmunah he schoolah hian zirlai 103 awmin, Zirtirtu 4 an awm mek a ni.

Attachment

• Loading attachment...