World No Tobacco Month hmanna kal zelah vawiin khan Lawngtlai Anti-Tobacco Squad leh Lawngtlai Traffic Police te chuan Lawngtlai khawpui chhungah joint drive an nei.
He joint drive-ah hian phal lohna hmun leh puipunna hmuna mei zu leh lirthei khalh chunga mei zu te an vai a. Dan bawhchhia mi 31 man niin, he’ng dan bawhchhia an mante hi COTPA sec 4 leh Motor Vehicle Act 1988 sec 19(1)(f) tlawh chhana pawisa chawitir an ni.
He hunah hian sumdawnna lirthei – taxi, auto rickshaw leh maxi cab enkawltute chu COTPA dan chiang zawka hrilhfiah nghal zel an ni a. ‘Mei zuk phal loh’ tih sticker pawh an motor enkawl laiah tarsak zel an ni bawk. Sumdawnnaa hman lirthei mai bakah, maxi cab counter-ah te pawh drive hi neih a ni.
Tun tum hi Lawngtlaia World No Tobacco Month 2017 puala vawi thum feh chhuahna a ni.
