Vawiin khan Hortoki Village Council te buatsaihin kumina HSLC leh HSSLC pass thar te lawmpuina hun Gov’t Hortoki High School-ah hman a ni a; Bialtu MLA Pu Hmingdailova Khiangte, Parliamentary Secretary chuan a hmanpui. 

Hortoki khua atanga HSLC leh HSSLC pass tharte lawmpuina hun hmannaah hian Pu Hmingdailova Khiangte chuan Zirlai pass thar te chu tuna la zir mekte tana entawn tlak ni tur leh tawpsan mai lova hlawhtlin zel tum turin a fuih a; chumi tur chuan Zirlai nu leh pa te pawhin mawhphurhna sang tak innei a ni a ti bawk. Tin, Zirtirtute thawhrah chu zirlaiteah a lang thin a, zirlai ten hlawhtlinna duhawm an neih zel theih nan taima taka zirna kalpui turin zirtirtute a fuih bawk. 

 Zirlai pass thar te hnenah lawmpuina thuziak hlan a ni a. Pass tharte hi HSLC ah mi 24 leh HSSLC ah mi 19 te an ni a. Bialtu MLA hian Gov’t Hortoki High School-in Mathematics Teacher an neih loh rawihna tur thla 6 chhung atan thla tin Rs. 5000 a tum sak dawn a; Hortoki Village Council-in Rs. 2000 an tum dawn thung a ni.