4212/2024-2025

Siaha the 12th February 2025: Vawiin tlai dar 3:00 khan DC Mini Conference Hall, Siaha-ah Pu VL Hruaizela Khiangte, Chairman, District Level Fire Prevention Committee leh Deputy Commissioner, Siaha nibawk kaihruaiin Kangmei ven hapta hman dan tur relin District Level Fire Prevention Committee te an thutkhawm. 

Chairman Pu VL Hruaizela Khiangte chuan, Lo neitute tana lo hal theih hun hnuhnung ber chu ni 15 March anih thu sawiin, huan neituten ni 28 February hmain mei kawng tha tak an sial hnuah an hal ngei tur a ni a ti. Boruak tha siamtu leh chakkhai mamawh chi hrang hrang hman tur min petu ramngaw uluk taka enkawl chu khua leh tui thate bat a ni a, inelna rilru pu miah lo pawhin ram kang ven leh tikang lo tura hmalak chu mitin mawhphurhna a ni tih a sawi bawk. 

Pu VL Hruaizela Khiangte chuan mipuite hnenah a tam thei ang ber zirtirna pek a pawimawhzia sawiin department mal hmalak theihna a nih loh avangin tlawmngai pawl leh khawtlang hruaitute nen pheikhai rual taka hmalak ho a pawimawh a, inzirtirna pawh a tam thei ang ber buatsaih tha a tih thu a sawi. Mipuite hnena zirtirna pek chu pek tawh a awm thei lo va, hriatsa inhrilhnawn fo pawh a sawt hle tiin  committee member te pawh mahni zawn theuhah ramkang ven kawngahte, ram tikang lo tura fimkhur kawngahte mi dang hrilhhriaa zirtirtu ni turin a sawm bawk.

Ram kang pawizia sawiin Pu VL Hruaizela Khiangte chuan ram kang chuan tuihna a tikangchat a, leilung a tichhiain boruak a tibawlhhlawh a, a tuartu chu mihringte leh nungchate bawk kan nih avangin lo neitu leh huan hal tur reng rengin mei kawng tha taka sial tur a ni a, mei kawng sial that anih chuan ram dang kang kai lovin kan hal duh lai chin chiah a kang a, thing leh mau chereu tur nasa takin kan veng thei a ni, a ti bawk. 

Kangmei ven hapta hawnna hun chu February 14, zing dar 7:30-ah Forest Conference Hall, MADC-ah hman nise tih relin khuallianah Pu VL Hruaizela Khiangte, Deputy Commissioner, Siaha chu ruat a ni. Kumin kangmei ven hapta thupui chu “Kangmei venhim hi kan tu leh fate hmakhua a ni” tih a ni.

Vawiin thutkhawmah hian sawrkar official bakah Join Village Council, NGOs, MJA leh Environment, Forests and Climate Change, MADC-a thawktute te an tel.