2570/2024-2025

Siaha the 17th October 2024: Kumin Krismas leh Kumthar vuakveta mipui ten hlim leh lawm taka hun an hman theuh theih nan puak thei thil Halpuah, Halmawi leh a kaihhnawih chi hrang hrang khapna kenkawh dan tur relin vawiin khan DC Mini Conference Hall, Siaha-ah thutkhawmna neih a ni a, Addl DC Pu Abraham Beirazi Khithie chuan he hun hi a kaihruai a ni.

Hun kaihruaitu Pu Abraham Beirazi Khithie chuan Hunpui lo thleng turah mi zawng zawngin hlim leh thlamuang taka hun an hman theuh theih nan hriselna khawih pawi thei heng halpuah, halmawi leh a kaihhnawh chi hrang hrang, naupang silai lem (a mu kapchhuak thei) lakluh, hralhchhuah, kawl leh hman khapna thupek (prohibitory order) chhuah a nih tawh thu a tarlang a, chu thupek chu khauh zawka kenkawh a nih theih nan Police, NGO te leh Kohhran-te thawhhopuiah a sawm. Kum dang aia hmaa Halpuah leh a kaihhnawih khapna chungchang rel a nih chhan chu mipuite hnenah a hma lama puanzar a tul a, sumdawngte pawhin a hma lama an lo hriat a, lakluh leh zawrh chhuah a nih loh nana rel a ni tih tarlan a ni. Supply reduction Mai bakah Diwali, October Ni 31 a lo thleng mai tur huam tel a nih vang a nih thu tarlan a ni bawk.

Kum 2024 Krismas leh 2025 Kumthar lo thleng tur atan mipuiten thlamuang tak leh hlim taka hun an hman theih nan halpuah, halmawi leh puak thei thil lam chi reng reng kum dang zawng aia khauh zawka khap tura hmalak rel niin, District Administrator, Police leh khawtlang hruaitute, NGO te nen tangrual a, theihtawp chhuah an rel a, Kohhran tina puanzar bakah zirna In ah te, Sawrkar hnathawk leh an chhungte hnena khauh zawka he dan kengkawh tura hriattirna chhuah te, Siaha District chhunga Paramilitary force awm te bakah BIPL, BRO leh BRTF te hnena hriattirna pek te, Siaha District chhunga sumdawng intelkhawm pawl, Chamber of Commerce te hnena hriattirna chhuah te leh social media hmanga zau thei ang bera puanzar an rel bawk a ni. Vawiin meeting chuan December thla tir lamah review meeting neih leh ni se a ti a, khapna thupek chhuah ringawt lovin Halpuah leh a kaihhnawihin mihring hriselna a khawih pawi theih dan uar zawka puanzar ni se a ti bawk a ni.

Vawiin thutkhawmah hian Siaha District Superintendent of Police Pu KL Vulmawia, SDO (S) Pu Vanlalchhuanliana te bakah SDC te, Asst Commissioner, Excise &Narcotics Dept, LAD MADC aiawhte, RTO, MADC te leh MTP Gen Hqrts President te an tel a ni. ‎