Vawiin chawhma dar 11:00Am khan DC’s Conference Hall-ah AH & Vety Department, Siaha District te buatsaihin, “Launching Programme of Deworming in Pig” leh “Condolence of PRRS Victim” programme hman a ni.

He programme hi Session hnih a thenin, Session khatna-ah “Deworming in Pig” hawnna programme hman a ni a.  He Deworming Programme hi  Dr. C.Zarzokima, DVO, Siaha in kaihruaiin, Pi Harleen Kaur IAS, District Bawrhsap chu khuallian niin a hmanpui bawk.

Pi Harleen Kaur chuan vawiin hun hmannaah hian thusawiin, kan ranvulh te zingah hian vawksa hi kan ei tlanglawn ber a ni a. Vawk leh  a vulhtu mihring te-ah hian natna inkaih chhawn thei tam tak a awm a, chungzingah kan District-a hluar ber chu  rulhut hi a ni awm e. He tianga DVO Office in kan District mipui te kan sa ei atanga rulhut kan pai loh nan leh kan ranvulh te Rulhut laka an fihlim theih nana Deworming Programme an kalpui tur hi a lawmawm tak zet a, kan ranvulh te an hrisel chuan a sa eitu kei ni pawh kan lo hrisel mai dawn a ni, a ti.

Session 2-na hi NLUP vawkvulh PRRS (Porcine Reproductive and Respiratory Syndrome) natna avanga chan ta te zangna dawmna hlanna programme niin, Pu Beirahmo Syhly, EM (AH&Vety) MADC chu khuallian a ni. Pu Beirahmo chuan Pu Lalthanhawla kaihruai sawrkar chak tak chuan kuthnathawktu te leh pachhia te leirem an rah ve nan NLUP programme ropui tak duangin, a  chhunzawmna tur NEDP pawh a duang chhuak leh tawh a ni tih chu Mizoram mipui ten kan hre vek a. NLUP hnuaia vawkvulh tanpuina dawngtu ten PRRS natna avanga an vawk chan ta te zangna dawmna a han siamsak leh zel te hian kan CM in mirethei zawk te leh kuthnathawktu te a hmangaihzia a lang chiang hle a. Vawiin vawkvulhtu lo kal khawm te hian  kan CM leh AH & Vety Minister Pu Ngunlianchunga te chungah lawmthu i sawi mawlh mawlh ang u, a ti bawk a ni.

Vawiin Vawkvulhtu zangna dawmna  dawngtu te hi mi 48 an ni a, Vawk note 1 zelah Rs 500/- leh  Vawk note aia lian leh puitling tawh 1 zelah  Rs.1000/- zangna dawmna pek an ni a. A vaiin Rs.1,79,500/- sem chhuah niin, a dawng hnem berin Rs.23,500/- dawngin, a tlem ber in Rs.500/- an dawng a ni.