1791/2025-2026

Siaha the 8th October 2025: District Development Coordination & Monitoring Committee (DISHA) meeting chu vawiin khan District Rural Resource Centre, DRDO, Siaha-ah Mizoram Lok Sabha MP Pu Richard Vanlalhmangaiha, DISHA Chairman hova neih a ni a, 40- Palak (ST) A/C MLA Pu K Hrahmo pawhin he hun hi a hmanpui a ni.

Lok Sabha MP Pu Richard Vanlalhmangaiha chuan Palak MLA Pu K Hrahmo, MADC Dy CEM Pu S Lalremthanga, District Bawrhsap Pu VL Hruaizela Khiangte, Department hotute leh NGO hrang hrang aiawh kalkhawmte chungah lawmthu a sawi a, DISHA meeting hlawhtling taka neih a nih theih nana tha taka an in buatsaihnaah lawmthu a hrilh a ni.

Lok Sabha MP chuan DISHA meeting chu kum khatah vawi 4 (Quarterly) neih thin tura ruahman a ni a, a theih chinah a hun taka neih chhunzawm zel tum a ni, a ti. Sawrkar Laipui chuan Vikshit Bharat 2047, India in zalenna a hmuh atanga a kum 100na, kum 2047 a lo awm turah hmasawn mek ram (Developing Country) atanga Ram Hmasawn (Developed Country) nih a tumna atan nasa takin a inpuahchah a, DISHA pawh Vikshit Bharat 2047 inpuahchahna atana hmalakna pawimawh tak a ni tiin DISHA Meeting leh thurelte ngai pawimawh thin turin a sawm a, Department-te thawkho a, infinchhuah ho a tul thu a sawi bawk a ni.

Palak Bialtu MLA Pu K Hrahmo chuan District mipui ngai pawimawha DISHA meeting a rawn telpui avangin Pu Richard Vanlalhmangaiha chu lawmthu a hrilh a, District mamawh hrang hrangte ngaihvenpuia, a tul anga Sawrkar laipuia thlen saka , bawhzui pui thin turin a ngen. Department hotute chungah rinna thuk tak a nghah thu tarlangin District hmasawnna tura theihtawp chhuahpui turin a sawm nghal bawk a ni.

 District Bawrhsap Pu VL Hruaizela Khiangte leh MADC Dy CEM Pu S Lalremthanga te pawhin Lok Sabha MP chu lawmthu an hrilh a, District dangte hmasawnna leh changkanna ruala ke an pen ve theihna tura tan lak kawngah theihtawp chhuahpui turin an ngen bawk a ni.

Vawiina DISHA Meeting-ah hian Department hrang hrang hnuaia Sawrkar Laipui Scheme kalpui ten an hmalaknate bakah harsatna an neih te sawizauna an nei a, kum 2024-25 chhunga 2nd quarter leh 3rd quarter bika hmalakna leh 2025-26 FY chhunga 1st leh 2nd Quarter inkara Central Scheme hmalakna thlirho a ni.

DISHA chu Ministry of Rural Development, Govt of India hnuaia programme niin District hrang hranga Central Sawrkar Scheme te vil a, central scheme khawihtu department hrang hrangten thawhhona tha an neih theih nana hmalakna a ni a, Member of Parliament, Lok Sabha chu chairman niin District Bawrhsap te Member Secretary an ni thung a ni.