1792/2025-2026

Aizawl, 8.10.2025: Ni thum awh tur Mizoram Travel Fest 2025 chu vawiin khan a hawnna inkhawm Mc Cabe Hall, Aijal Club ah Tourism Minister Pu Lalnghinglova Hmar hovin hman a ni. Mizoram Travel Fest 2025 hi tourism in hma a sawn theihna tura inrawnkhawmna, zirhona leh indawrtawnna hun atana Mizoram Tourism Department leh Sorkar laipuia Ministry of Tourism tangkawp buatsaih a ni a; vawiin October ni 8 atanga ni 10 thleng a awh ang.

Tourism Minister chuan tun kum reilote chhunga Mizoramah khualzin zat nasa taka a pun thu sawiin, Sairang thleng rel lu lo lut avangin an pun belh zel pawh a rinawm thu a sawi a. Chumi avang chuan Mizoram chhung ami ten khualzin lo dawnsawn dan kawnga kan inpuahchah that a pawimawh thu a sawi. Tourism Minister chuan Mizoram tlawhtu khualzin zat thang chak hle mahse state dangte nen khaikhin chuan a la tlem thu a sawi a. Khualzin hipna ni pah fawm a kut leh thildang hrang hrang kan buatsaih thin chu kum tina hun nghet nei a, "tourism calendar" siam tha a tih thu a sawi a. Anthurium Festival pawh nakum kum 2026 atang chuan kumtin hun nghet ruat in Reiek ah buatsaih ziah tum a nih thu Pu Lalnghinglova Hmar hian a sawi a. Hetianga tourism calendar siam theih a nih chuan state pawn atanga Mizoram rawn tlawh tum te tan pawh a awlsam phah dawn a ni, a ti. Minister chuan 'tourism' tih hian state pawn khualzin chauh a huamloh thu sawiin, state chhung ami te pawh khaw dang kan tlawh in tourist kan nih vek thu leh, economy than nan local tourism a pawimawh tel thu a sawi bawk.

Mizoram khualzin pung zel tur thlir chungin Tourism Minister chuan inbuatsaihan tha kan neih tlan pawimawh a tih thu a sawi a. Khualzinte lo dawnsawn kawngah tour guide-te, hotel, taxi/ can service, dawr leh ei tur zawng zawng bakah mipuite inzirna tur kan la neih thu sawiin, tourism ah chuan infrastructure, hmasawnna ruhrel din ai mahin mihring hmasawnna ngaipawimawh hmasak a tul thu a sawi a ni. Minister chuan tourism hi a tawpah chuan mi tamtak tan eizawnna siamna a nih avangin, tluang takin leh dik taka hma kan sawn theih nan he Travel Fest hi tangkai taka hman a nih a beisei thu a sawi.

Mizoram Travel Fest hawnna inkhawmah hian Dr. KC Lalmalsawmzauva, Adviser to CM pawhin a telpui a. Pi R. Lalrodingi, Director, Tourism Department chuan kalkhawmte lawmna thu a sawi a. ICFAI University Vice Chancellor Prof. Dr. Ginlianlal Buhril hnen atangin thusawi ngaihthlak ni bawkin, Mizoram tan chuan khualzin tam thei ang ber an lo luhna atan ringawt hma la lovin, khualzin experience tha siam tur zawnga hmalak tha a tih thu a sawi.

Dr. Pankaj Kumar, Associate Professor, Mizoram University hnen atangin Mizoramin tourism lama hma a sawn theihna tura khawtlang thuamthat pawimawhna leh hmalak theih dan tur te a sawi bawk. Hawnna inkhawm hi Tourism Department Joint Director Pi Lalthakimi Pachuau chuan lawmthu sawiin a khar a ni.

Travel Fest hawnna inkhawm neih zawh hian Aijal Club Park ah YWCA nen tangkawpa buatsaih, Mizo Thali Cooking Competition neih chhunzawm a ni. Naktuk hian Chief Minister hovin "Revitalizing Mizoram's Tourism: Sustainable Growth Through Community Partnerships" tih thupui hmangin zirhona neih a ni ang a. Stakeholders discussion leh Tourist Service Provider te tan B2B session buatsaih a ni bawk ang. A ni thum ni chu investor te nen a inkawmna hun atana ruahman a ni.