Vawiin chawhma dar 10:30 Am khan District Playground, Siaha-ah Lyuvakhutla ropui leh urhsun taka lawm a ni.

Vawiin-a Lyuvakhutla hmanna-ah hian Pu RT. Zachono, CEM, MADC chu Azipa (Kut Pa) a ni a, Pu N. Lybei chuan Hlado chhamna a nei hnua Pu V. Zacho, Executive Secretary, MADC leh Lyuvakhutla Organising Board Chairman nibawk chuan mipuite chawnglawmna thu a sawi hnuah, Kut Pa Pu RT. Zachono chuan Kut Puanzar pawtpharh in he Kut hi a hawng a ni.

Kut Pa Pu RT. Zachono chuan thu sawiin he Kut kan hman hian kan Pi leh Pute hunlai min hriatchhuahtir a, mi rethei leh mi awmthei te pawhin he Ni hi hlim leh inlungrual takin an hmang thin a, hmeithai leh fahrate tan Ni hlimawm ber a ni thin a ni ati, he Kut hi Mara fate tan ni chhinchhiah tlak tak a ni a, hmasawnna chikhat a nih bakah he Kut hian kan hnam min tihchianga, Mara fate min huikhawmtu ani ati bawk. He Ni hi inthianthatna Ni, in hmangaihna Ni a ni a, mi zawng zawngin inhmangaih leh hlim taka he Kut hi hmang theuh turin a chah bawk a ni.

He Kut lawmna ah hian School hrang hrang atangin Pawnto hmuhnawm tak entir a ni a, Hnam Incheina M.CH.P. Gen.Hqrs ten an entir bakah, Hnam lam hrang hrang MTP Branch sawmpakhat atang leh YLA Sub-Hqrs leh Siaha Group YMA ten an entir a ni.

He Kut lawmna chikhat atan 2016 Lyuvakhutla Chhivaw leh Khydi ( Miss & Mister) thlanna neih a ni a, kum 2016 Lyuvakhutla Miss atan Ls. Jeslin Lynanokhai D/o S.Chhuachhua, Meisavaih West leh kum 2016 Lyuvakhutla Mister atan Mr John Benison Tlapyu S/o T.Chatlua, New Colony te thlan an ni bawk. Pu Zarzosanga IAS, Deputy Commissioner, Siaha chuan lawmman semna hun hmangin, Pu V. Zacho, Executive Secretary, MADC leh Chairman, Lyuvakhutla Organising Board nihbawk chuan lawmthu sawinain vawiin 2016 Lyuvakhutla lawmna hun hi a khar a ni.