Vawiin ah khan Mizoram Governor Lt Gen. Nirbhay Sharma (Retd.) chuan NEEPCO Tuirial 60MW Hydroelectric Project (Tuirial HEP) tlawh in hmalakna kal mek a endik.
Governor hi Secretry to Governor Pu Rodney L. Ralte leh Er. L. Pachuau, E-in-C, Power & Electricity Department (P&E) in tawiawm in Project Site ah hian Pu M.K. Sharma, Executive Director, Project Hydro, NEEPCO Office, Guwahai, Pu P.K. Bora, Head Of Project, Tuirial NEEPCO leh NEEPCO engineer ten an lo dawng sawng a. Kolasib DC Pu H.Lalengmawia, Kolasib SP Pu C. Lalzahngoa leh District Head of Department te pawh he hunah hian an tel a ni.
NEEPCO Engineer te chuan Governor Lt Gen. Nirbhay Sharma (Retd.) chu Dam site, Chute, Spill Way leh project site hmun pawimawh te fankual puiin Tuirial HEP a hnathawh tur awm zinga 82% chu thawh zawh a nih tawh thu an lo hrilh a. Governor chuan an hmasawnna te hrilhhriat thin tur leh Kolasib District Administration leh District mipui te nena thawh hona tha neih a pawimawh thu NEEPCO hotute chu a hrilh bakah tualchhungmite hamthatna pawh ngaihthah lo turin a chah a. Governor chuan Tuirial HEP chu Mizoram tan a pawimawh thu leh Mizo mipui ten an nghahhlelh thu tarlangin hun taka thawk zo hman turin NEEPCO Engineer te chu a chah a ni.
NEEPCO Official te hian Telecom Network Improvement an mamawh thu bakah Saiphai leh Saipum inkar kawngpui siamthat an mamawh thu Governor hnenah hian thlen in Governor chuan a lo zirchian tur thu leh a theih anga lo bawhzui a tum thu a sawi.
NEEPCO hotute chuan Unit- I 30 MW chu September, 2016 ah zawh hman an tum thu tarlang in 2017 Financial Year chhungin Unit - II 30 MW pawh zawh hman an inbesei thu an tarlang.
