Mizoram pum YMA member te tana Central YMA leh I&PR Department te tangkawpa huaihawt ‘Khawtlang Nun Siamthat’ Workshop, Lalthanhawla Auditorium-a neih chu vawiin chawhma lam khan Chief Minister Pu Lal Thanhawla hova neih a nih hnuin chawhnu lamah I&PR Minister Pu Lal Thanzara hovin neih chhunzawm a ni a, khawtlang nun siamthat nana thupui pawimawh tak tak te zirho a ni.

Khuallian Pu Lal Thanzara chuan thusawiin kan hun tawng mek nena inhmeh tak, ‘Ram leh Hnam chhan turin rawn pen chhuak rawh’ tih thupui hmanga Khawtlang Nun Siamthat Workshop, Central YMA leh I&PR Department ten an buatsaih chu lawmthu a sawi a. Ruihhlo hmanga setana’n Mizo thalaite nasa taka min run a, chumi phena awlsam taka sum siam nana ruihhlo hmanga sumdawng, khawchhak unaute bakah Aizawl mi te ngei pawh an awm chho mek ta chu a vanduaithlakin a pawi tak zet a ni, a ti. Chu chuan ram leh hnam chhan tura YMA member zawng zawng te kan pen chhuah a tul tawh tak zet a ni tih a tichiang hle a ni, a ti bawk. Ruihhlo buaipui vanga nungchang tha hlohva, hmeichhiat mipat hman khawlohna kan thalaite zinga a lo hluar ta bawk chuan kan ram leh hnam HIV/AIDS natna-in boralna khurah min hnuk let mek bawk a ni tiin Minister chuan chhan tlak kan la awm lai hian zirlai pawl, tlawmngai pawl, sawrkar institution hrang hrang leh kohhran lamah pawh ralpui phiara kan phiar a, kan do loh chuan kan tlai palh ang tih a hlauhawm hle a ni, a ti. YMA member tlawmngai, Kum puan Committee member te leh SRS member ten nitin ruihhlo cheng nuai tam tak man an man thawm te, kum 3/4 chhunga HIV hrik kai thar 70% te chu hmeichhiat mipat hman khawlohna atangin a ni tih zirmi ten an hmuhchhuah te chu a rapthlak a, chung avangte chuan kan puan ven kan sawichhina ram leh hnam chhan tura kan penchhuah a tul tawh tak zet a ni tiin YMA member kalkhawmte chu a chah bawk. Kan ram leh hnam humhalh chu Mizo zawng zawng mawh a ni a, khawtlang nun siamthat hna pawh mimal tin nunah a innghat tlat a ni tiin Pu Lal Thanzara chuan nungchang uluk a, ruihhlo laka inthiar fihlim a, taima tak leh rinawm taka, Pathian tih chunga hna thawk turin leh rilru siamthar theuh turin kalkhawmte chu a sawm bawk a ni.

Vawiin Workshop chawhnu programme hi Pu R.Lalngheta, Asst. Secretary, Central YMA-in a kaihruai a, I&PR Director Pu Jim K.Chozah pawhin thusawiin khawtlang nun siamthat chu kan ram leh hnamin a mamawh tih hriain theihtawp chhuaha hma an lakna te sawrkar hotute pawhin lo ngaihpawimawh saka a tihhlawhtlin sak avangin lawmthu a sawi a, khawtlang nuna sualna leh thil thalo mithiam ten an zirtirna te chu a hlawhtlin ngei theih nan kalkhawmte chu theihtawp chhuaha bawhzui theuh turin a sawm bawk.

Workshop ah hian Pu Joseph Lalchhuana, IPS, DIGP, CID leh Pu Lalsawma Pachuau, Joint Director (F&D) Health Department ten power point presentation hmangin Social Media, Human Trafficking leh Methamphetamine damdawi chungchang te an sawifiah a, YMA member kalkhawm ten an hlawkpui hle a ni.

Workshop ah hian CYMA Vice President Pu Vanlalruata pawhin thusawina hun a hmang bawk a ni. Workshop hi Dr C.Lalhrekima, HOD Psychiatry, Aizawl Civil Hospital, Pi Florence Zotluangpuii, Dy. Secretary, I&PR, tlawmngai pawl hrang hrang te, MJA leh sawm bik ten an hmanpui a ni.