Vawiin chawhnu dar 2:00PM khan Siaha District, CMO Dr. Lalparliani Office Chamber-ah kan hmalawk April 15- April 27 chhunga MRV (Measles Rubella Vaccination) Campaign  Beihpui thlak tura, Siaha District inpuahchahna kalpui mek leh hmachhawp te thlir ho vin, MRV Core Committee member te an thukhawm.

Dr.Lalparliani  CMO chuan an Meeting kohna ngai pawimawha Core Department hotute leh NGO hrang hrang hruaitute a office chamber-a an lo kal khawm avangin lawmthu sawiin,Siaha District hi Measles(Sentut)  leh Rubella( German Sentut) awm lohna  District a siamturin Core committee member tin ten theihtawp i chhuah ang u, tiin meeting member te a sawm. 

MRV Nodal Officer Dr.Hniechho pawhin  Measles(Sentut) leh Rubella( German Sentut) vaccine pek tur chungchanga Core Department leh Committee member tin te  hriattur pawimawh leh mawhphurhna hrang hrang te sawizauna leh hrilhfiahna hun hmangin,  tuna MRV a 100% kan hlawhtlin chuan tun atanga reilote-ah  Siaha District hi MR Hard Immune District kan ni tawh dawn a ni, a ti.

Dr.Joseph Denapawhin  Check list hrang hrang te sawifiahna hun a hmang bawk.

MR Vaccine hi naupang thla 9 pumhlum atanga kum 15 hnuailam naupang zawng zawng hnena pek vek tur a ni a. Tunah hian MR vaccine la theih naupang hi Siaha District-ah 18000 vel an awm mek a ni.

Measles(Sentut) natna hi nunna atana hlauawm, hritlang anga inkaichhawn theih a ni a.He natna hian rualbanlohna leh hun lo taka naupang thihna a thlen thei a ni.

Rubella(German Sentut) natna hi Nu naupaiin, a raino laia a lo vei palh hlauh chuan nau piansualna leh nau  te hrisellohna hrang hrang leh thihna hial a thlen thei bawk a ni.

MR vaccine hi a him tawk hle a, tunah hian India ram state 15-ah MRV beihpui thlak tawh a ni a. Naupang vaibelchhe 8 MR vaccine pek tawh an ni. MR Vaccine lak avanga insawiselna report engmah dawn a ni lo.