Vawiin chawhma dar 10:00Am khan Siaha-ah Chhiatna a lo thlen thulha chet lak dan a taka inkawhmuhna Mock Drill neih a ni.

Vawiin Mock Drill neihna-ah hian Siaha khawpui chu Lirnghing 7.5 Magnitude a na angin thlentir a ni a, Siaha khawpui chhung hmun pawimawh zual heng - DRDA Office, S.P. Office, Government High School, Adventist English Academy leh E.C.M. High School-ah te chhiatna liantham thlentir a ni.

He hunah hian vengchhunga mipuite leh tlawmngai pawl hrang hrangte pawhin phur takin an tel a, dan kengkawhtute leh thuneitu hrang hrangte pawh an tel bawk a ni. Police leh Adventure Club lamin chhanchhuah hna an thawk a, Fire & Emergency Services ten kangmei chhuah thula kang thelh hna an thawk bawk a ni. Damdawi In a thawktuten hliam enkawl leh mitthi lema changte sawngbawl hna an thawk bawk a ni.

Vawiin lemchan entir zawh hian Incident Commander Pu James Lalnunmawia, Addl. Deputy Commissioner hovin a Office Chamber-ah chanvo hrang hranga mawhphurna changtuten an chet dan thlirletna hun an neih bakah hmasawnna tur tam tak an hmuh thute sawiin, duhthusam loh lai leh siamrem ngai ni a an hriatte pawh an tarlang bawk a ni.