Vawiin khan Mizoram district dangte rualin Lunglei khawpuiah National Disaster Management Authority (NDMA), New Delhi leh Disaster Management & Rehabilitation Department, Mizoram ten ruahmanna an siam angin Multi State Mega Mock Exercise on Earthquake Disaster chu hlawhtling taka zawh fel a ni.
Mockdrill-ah hian District Emergency Operation Centre (DEOC) ah DC Conference Hall chu ruahman niin Deputy Commissioner, Superintendent of Police leh official dangte he hmunah hian an duty a, Planning Section, Operations Section, Logistics Section leh inbiakpawhna hmunpui Communication Unit (MPRO) te fel taka ruahman an ni. Staging Area-ah DTO kawtzawl hman a ni. 
He hunah hian Lunglei khawpui chhunga hmun panga ah lirnghing thlen thuta chhawmdawl hna thawh dan tur leh chhiatna tam zawk a thlen lohna tur  atana chet lak dan tur Mockdrill neih a ni:
1.       Sobji Market area – kangmei chhuak leh market building chim
2.       Jedaz Petrol Pump Area, Zotlang – Leimin 
3.       Government Higher Secondary School, Chanmari – School building chim leh road block
4.        Bazar Veng Main Road (near SBI Bazar Veng) – Kangmei chhuak
5.       Venglai to Electric Veng Road (near Apex bank) – building chim leh road block
Heng hmun ah te hian chawhma dar 10:00 AM ah lirnghing thlen avangin siren tih rik a ni a, chawhma 10:05 AM ah Deputy Commissioner-in chhawmdawl hna thawk tur Rescue Team leh Medical Team te thawkchhuak turin thupek a siam a ni. Heng hmun panga ah hian YMA, khawtlang hruaitu VC, Lunglei Adventure Club, 1st Assam Rifles, 61st Battalion BSF, SDRF  leh  Civil Hospital leh Christian Hospital Serkawn doctor leh nurse- ten hliam tuarte chhanchhuah hna leh nunna chan te felfai taka buaipui hna an thawk a. Mockdrill-ah hian JCB pakhat, Ambulance panga leh kangthleh motor pahnih te an che chhuak a ni. He Mockdrill-ah hian hliam tuar mi 50 leh nunna chan mi 15 an awm. 
Mega Mockdrill zawhfel hnu hian DC Confernce Hall-ah Lunglei DC Pu Benjamin Lalzama kaihhruaina hnuaiah Mockdrill thlirletna leh sawihona hun Debriefing session hman a ni. Pu Benjamin Lalzama chuan YMA, VC, BSF, AR, SDRF, Lunglei Photographers Association, Lunglei Adventure Club leh official tel zawng zawng te thawhrimna leh inpekna avangin Mockdrill hlawhtling tak kan nei thei a ni tiin an chungah lawmthu a sawi a.  He hunah hian Site Observer ten chhaitrupna thlenna hmuna chhawmdawl hna kalpui dan tlangpui te an sawifiah a. NDMA Observer Major Ramandeep Makkar pawhin thu sawina hun hmangin Lunglei khawpui chhunga Mockdrill kalpui dan chu tha leh felfai a tih thu a tarlang. 
Lunglei District Disaster Management Authority chuan Mockdrill hlawhtling taka neih a ni chu lawmawm an tih thu tarlangin Lunglei mipuite chungah lawmthu an sawi a ni.