Vawiin chawhma dar 11: 00 Am khan District Child Protection Unit Siaha, Siaha Auto-Rickshaw Owners Association,SP Office Siaha leh World Vision, Siaha Cluster te tangkawp  buatsaihin Rally Against Child Sexual Abuse( Naupang Pawngsual/khuaikhem dona kawng zawh) chu Siaha khawpui chhungah hlawhtling taka neih a ni.  

Vawiin Programme hi Pi.Malsawmtluangi Pachuau, Protection Officer,District Child Protection Unit, Siaha - in a kaihruai a, Dr.David Zaitinvawra, District Child Protection Officer,Siaha in Naupang Pawngsual dona kawng zawh buatsaih a nih chhan sawiin, India ram mai nilovin Mizoram leh Siaha District-ah ngei pawh Naupang Pawngsual a hluar tak em avanga he Rally hi buatsaih a nih thu a sawi.

Naupang pawisawilo ten Pawngsual an tawh zel lohna atan mipuite thawh ho that a pawimawh thu sawiin, Auto- Rickshaw Driver-te pawhin mipat hmeichhiatna kawnga harsatna tawk Naupang an hria a nih chuan District Child Protection Unit Office-ah emaw Police te emaw hriattir thin turin kalkhawmte a sawm bawk.

Pu F.Lalbiakzauva,Addl.SP.  pawhin thu sawiin, Naupang Pawngsual dona kawnga District Child Protection Unit te hmalakna te fakin, an theih ang anga tawiawm turin kalkhawmte a sawm a.POCSO Act, 2012 hian hremna na tak a ken tel avang leh a tuartu naupangte nun a khawihchhiat nasat theih em avangin leh Siaha District chhunga naupangte an lo him zawk theih nan  ngun leh zuala mipuite hnena zirtirna pek hi thil pawimawh tak a nih thu a sawi.Pu.N.Vanlalsanga, President, Siaha Auto Rickshaw Owners' Association pawhin Rally neih chhan leh Drivers te tan thu pawimawh sawina hun a hmang bawk.    

He Rally-ah hian Siaha khawpui chhunga Auto-Rickshaw za (100) chuangin mipat hmeichhiatna kawnga Naupang khawihchhiat a nih thin duh lohna kawng an zawh a, an lirtheiah  Naupang Pawngsual duh lohna thuziak hrang hrang leh flag te tarin Siaha khawpui chhung an fang chhuak a ni. He hunah hian Siaha khawpui chhunga Children's Home-ah thawktute pawh an tel tha hle.