Vawiin khan Home Minister leh Acting Chief Minister ni bawk Pu R. Lalzirliana hovin a chenna inah Lump Sum Grant Higher Secondary School 9-te thil nawr chungchang leh law and order lama a thil nghawng te ngaihtuahin School Education Department, Home Department leh Finance Department hotute an thukhawm a. Finance Minister Pu Lalsawta leh School Education Minister Pu H. Rohluna te an tel a ni.

He meeting hian thil awm dan ngun taka a ngaihtuah hnu in heng private school pakua ten Ad-hoc Grant in Aid a hlankai an phut chu tun sawrkar sum dinhmun enin tihsak theih a niloh thu a sawi a. School Education Department chuan heng private school te din phalna a pek khan Sorkar atanga tanpuina emaw hamthatna emaw an beisei theih loh tur thu ziakin hriattirna pek an nih thu an sawi a. Chuti chung chuan sum awm dan azirin private school engemaw zat chu Lump Sum Grant pek an ni a. Heng lumsum grant an dawn mekte hi tipung turin tunhma deuh atang tawh khan hma lo lak tawh niin, sawrkarah file a kal mek thu meeting ah hian sawi a ni bawk. 

Vawiin committee chuan nu leh pa ten kan fate tan thiltha thei ang ber tihsak kan duh ang chiah hian sawrkar pawhin mipui tan a tha thei ang ber a tlin chinah chuan tih a duh thin a; chutihrual chuan sum neihin a tlin tawk ang zela rualkhai taka hmalak a ngaih thin avangin private school ten Ad Hoc GIA a hlankai an dilna chu tihhlawhtlin sak duh hle mahse a theih rih loh a ni, a ti a ni.

Vawiin committee hian thil phut nawr a zirna tibuai zawnga zirna in hialte khar a ni chu pawi a ti a. Mipui zin veivakte tana harsatna siam thei zawnga inkalpawhna kawng dan pawh thalo a ti hle bawk a. Hemi avang hian mipui tan harsatna a thlen loh nan Aizawl, Lunglei, Serchhip, Champhai leh Mamit Deputy Commissiner ten heng school awmna khaw pakua ah hian CrPC Section 144 puan nghal niin, zanin atangin heng district ah te hian Magistrate leh Police te duty tura tirhchhuah nghal an ni ang.