2352/2022-2023
Siaha October ni 17 : Vawiin khan Krishi Vigyan Kendra (KVK), Siaha Complex ah PM Kisan Samman Samela leh Awareness Programme on Natural Farming hun hman a ni. He programme hi Dr. H. Vanlalhmuliana, Senior Scientist and Head KVK, Siaha chuan a kaihruai a ni.

Chawhma programme lamah Prime Minister Shri Narendra Modi thusawi chu Live a thlir ho niin, Pu David K. Azyu, Assistant Hindi Propagation Officer, MADC chuan Loneitute hriatthiam thei turin a letling zel a ni.

Chawhnu programme hman chhunzawm nghal niin, vawiin a khuallian Dr. Chawngkhuma Chawngthu, President AMFU chuan thusawina hun a hmang. Khuallian chuan KVK leh AMFU te hi kan thawkho reng thin a, kan thawh hona pawh a tha hle a ni tiin, loneitute chu damdawi hmang lova thianghlim tak leh thlai chi tha leh hrisel chauh chin uar turin a chah hlawm a. Eizawnna tlak leh mipui chawm thei khawpa taimak chhuah zual zel turin a chah hlawm a ni.

Pu C. Lianluaia, DHO, Pi Elizabeth Khaimichho, Project Director ATMA, Pu K. Malsawma, Secretary AMFU te bakah Pu Lalrosanga, President Joint Village Council, Siaha ten fuihna thuchah tha tak tak sawina hun an hmang ve bawk a ni.

Pi J. Vanlalhluzuali chuan Natural Farming chanchin leh kuthnathawktute tana hlawk thlak tur te sawina hun a hmang ve bawk a ni. Vawiin programme hi Siaha town chhung bakah Lôbô, No-aotláh-III, Chhaolô leh Tisôpi khua ten he hun hi an chhim a ni.