Vawiin chawhma dar 10:30 AM khan Pu C. Ngunlianchunga, Minister of State, Govt. of Mizoram chuan YLA Sub. Hqrs, Siaha ten YLA Day vawi 42-na lawmna programme MYA Multipurpose Hall-a an buatsaihah khuallian niin a hmanpui.

Young Lai Association (YLA) 42nd Rising Day Lawmna Programme hi Pu Fc. Lalrinawma, President, YLA Sub-Hqrs, Siaha chuan a kaihruaia, Rev H. Lalhmangaiha, LIKBK chuan hunserh a hman zawhah No-aotlah, YLA Branch ten Hawnna hla mawi tak an sa a,mipui kalkhawm ten YLA Motto “ Khrihfa ziaza tha upat miphun zia le sinak runven ram le miphun caah rian tuanti”-( Krista nundan mawi chawisan , Ram leh hnam humhalh , Ram leh hnam hmasawnna tura thawh ho) Sawi rualna hun an hman zawhah Khuallian in thuchah sawina hun a hmang.

Pu Ngunliangchunga chuan Laifa a min siamtu hi Pathian a ni a, kan tawng, hnam ziarang leh nunphung humhalh hi Laifa mimal tin mawhphurhna a ni, a ti. Laifa te hi mihuaisen thin kan ni a, tun hnuah hian dawizep deuh ta a inngaihna kan thalaite zingah kan nei deuh emaw chu aw ka ti thin. Kan dawizep lo hle a ni tih hi 2013-a America a ka han kal khan ka mit ngeiin ka hmu a, khawchhak lama kan Laifa unau “Yes leh No” chauh hria tam takin America ramah awm hmun an bengbel ngam ka han hmu hian, India rama Laifa te hian kan Autonomous District Council-ah chauh hian sawrkar hna zawn tum tawh lo vin, India ram chauh ni lo Khawvel ram zau zawkah rinawmna, taimakna leh tumruhna nen hna zawnga kan vah chhuah ngam a hun tawh tak zet a ni, a ti.

Vawiin 42nd Rising Day lawmna Programme-ah hian Khuallian Pu Ngunlianchunga leh Pu Joseph Lalthankima 2nd Bat. MAP- August ni 13 zana I&PRO Office, Siaha rawktu mantu hnenah Chawimawina thuziak an hlan bawk. Vawiin Programme hi Session 2 a thenin, Session 1-na hi MYA Multipurpose Hall-a hman a ni a, Hnam Lam chi hrang hrang entirna leh Mal zai ngaithlakna hun te a hman a ni.

Session 2-na hi Live Band ten nen District Jail-a hman a ni a, Jail tangte hnenah thilpek te pawh pek a ni. Vawiin 42nd Rising Day pual hian YLA Sub. Hqrs , Siaha chuan District Hospital leh Maraland Gospel Centenary Hospital-ah Rs.3000/- ve ve an hlan bawk.

Vawiin Programme hmanna-ah hian Pu Ngunlianchunga’n YLA Sub. Hqrs hnenah tangka fai Rs. 50,000/- leh Sub. Hqrs. hnuaia branch 8 te hnenah Football, Volley Ball leh Silpauline 1 theuh a pe a. Vawiin 42nd YLA Rising Day lawmna Programme-a kum 70 chin chunglam lo tel te hnenah Rs. 500/- theuh a pe bawk.