Vawiin khan Pu R. Lalzirliana, Home Minister chuan Mamit District Jail, Sabual khaw hlui (Hmunhlui tlang) ami chu khuallian niin a hawng.

Pu R. Lalzirliana chuan thusawiin Mamit District Jail hawn a ni ta chu Mamit District tana hmasawnna ropui tak a ni a ti a, Jail chu misual hremna hmun ringawt nilovin dan bawhchhia leh misual ten nunphung pangai an zawh leh theihna tura inthununna hmun a ni a, nunthar neia he hmun an chhuahsan hi sorkar chuan a duh ber a ni anih avangin an tan chhungin kut themthiamna thil chi hrang hrangte zirtir an ni thin a ni a ti.

Home Minister chuan tun hnaia Lungleia thil thleng chungchangah thil diklo titu chu chhuizui an ni dawn a, dan lova thilti leh dan bawhchhia te chu sorkar chuan a hrem thin a, dan lova thilti kan huat viau laiin buaina sang zawk chawk chhuak zawnga kan chet hi dan kalh tlat a ni ve thung a ni a ti.

Zu zawrh phalna Sorkar chuan a ti chhuaka hei hi zu tel lova awm thei lo te tana zu chhia an in loh zawk nana sorkar in a ruahman a ni. Hei hian zu ruih emaw ruih vanga buaina siam phal a ni lova, hemi bawhchhiate te chu vantlang hmun tifaia hrem thin an ni a, hei hi thil zahthlak a nih avangin hemi hmanga thununte chuan tih nawn an chak tawh lo a ni a ti. Zu ruih avanga nupui fanau ti thlabar zawnga awmte chu an in chhungah ngei luhchilhin kan police ten an man thei a ni, hun hmasa lama kan Police phai lama duty a kal thin ruih vanga buai thinte pawh hmuh tur an awm tawh lo a ni a ti bawk.

Khualzahawm Pu John Rotluangliana, Bialtu MLA pawhin thusawiin Mamit District Jail hawn a ni chu Bialtu MLA a nihna angin pawhin lawmthu a sawi a, Mamit District ah Jail kan la neih loh avangin Mamit District court in thiam loh a chantir te Aizawl lamah in dah chhoh ngai thin a, chung anga harsatna sukiang tur chuan Mamit District chhunga thunun ngai misualte chu awlsam takin taninah an dah theih tawh dawn a ni tiin Sorkar chuan Mamit khua hmasawnna atan theihtawp a chhuah mek zel a, hmalak tawhna leh hmachhawp hrang hrangte a tarlang bawk a ni. Sorkar hmunhma leh vantlang thilte neitu thinlung pu chunga enkawl turin mamit mipuite a chah bawk a ni.

Mamit khawtlang aiawhin Pu P. Lalthara, President Joint V/C in Jail hmana theiha hmalak saktu Sorkar chungah lawmthu sawina a nei bawk a, Pu B.T Lala Sakachep CJM pawhin District Jail hawn a ni ta chu lawmawm a tih thu a sawi bawk.

Pi Zoramthangi Hauhnar, Inspector General of Prisons report peka a lan danin Mamit District Jail hi kum 1999 khan Sabual khawtlangte chuan a hmun phal taka pein, North East Policy Modernisation Scheme 2002-2007 atanga fund dawn Rs 294 lakhs leh 13th Fianance commission 2011-2015 Grant Rs 552 lakhs senga sak hna hi thawh a ni a, Building sak hna zawh a nih hnuah thawktu lam indaih lohna avangin Jail hi luah theiha hman theih a ni lova, kum 2014 ah sorkarin Mamit Jail atan hian thawktu lain chuta tang chuan luah theih tura hmalak chhoh a ni ta a ni a ti.

District Jail hawn hi mi 114 tan theihna niin mipa 70 leh hmeichhia 44 an awm thei a ni. District Jail hawn tharah hian Jail hung chhungah Building 9 leh hung pawn lamah thawktu quarter nen building 15 a awm a, Tunah hian thawktu Jail superintendent hovin mi 34 leh Armed security Guards ( MRHG) atangin mi 24 te chuan Mamit District Jail hi an thutchilh dawn a ni.

He hunah hian Pi Lalbiaksangi, District Bawrhsap chuan thusawina a nei bawk.

District Jail hawnna pual inkhawm hi Pu Lalbiakzama Addl Secretary, Home chuan a kaihruai a. Pu K.Lallawmthanga, DIG Prisons chuan lawmthu sawina a nei bawk. Mamit District Jail hawnna ah hian Mamit leh Aizawl atangin Sorkar Official thahnem tak leh Mamit atangin khawtlang hruaitute bakah mipui thahnem tak an tel a ni.