Vawiin chawhma dar 11:00AM khan District Bawrhsap Pi Harleen Kaur IAS,office Chamber-ah District Screening Committee on Housing for all Member te an thukhawm.

Vawiin meetingah hian Beneficiary Led Construction (BLC) hnuaia diltu mi 1978 dilna te leh Credit Linked Subsidy Scheme(CLSS) hnuaia diltu mi 162 te dilna enfiah a ni. BLC leh CLSS te hi kum 2022 thlenga kalpui tur an ni a. CLSS hnuaiah hian a vawikhatna (2016-2017) atan mi 70 hnenah Subsidy hi pek tur phawt a ni a, kum 5 chhung 2016-2022 hian mi engzat hnenah nge an pek ang tih a la hriat lo va. BLC hnuaiah erawh he kum 5 chhung (2016-2022) hian mi 1590 hnenah tanpuina pek tur a ni a, kum 2016-2017 atan hian mi engzat nge tanpuina pek tur tih erawh a la hriat theih ve loh thung a ni.

Vawiin meetingah hian Pu Hiphei, Speaker Mizoram Legislative Assembly te, Dr.K.Beichhua, MLA, Pu RT Zachono CEM, MADC te, Bawrhsap Pi Harleen kaur te, Pu N.Chakhai, Addl. D.C te,  Pi Marilyn Rualzakhumthangi, SDO(S) te  bakah UD&PA Official te  leh Bank pathum: SBI,MCAB leh MRB aiawh te an tel a ni.