3765/2024-2025

Siaha the 13th January, 2025: Vawiin khan DC Mini Conference Hall, Siaha-ah District Bawrhsap Pu VL Hruaizela Khiangte kaihhruaina hnuaiah kumin Republic Day lawm dan tur relin thutkhawm a ni. 

Bawrhsap Pu VL Hruaizela Khiangte chuan kalkhawmte chu chibai bukin Republic Day lawmna atan Sawrkar atangin sum hranpa a awmlo a, Department hrang hrangte thawhkhawm atanga hman thin a ni, a ti. NGO te nen thawhhona a that avanga programme hlawhtling taka an hmang thin chu lawmawm a tih thu a sawi. Khawvel ram hrang hrangin buaina nasa tak a hmachhawn mek laia boruak muanawm tak hnuaiah thil tha zawk relho theih a ni chu a thlamuanthlak hle a ti bawk a ni.

Kumin Republic day chu Pathianni a tlak avangin inkhawm tibuai lo turin zingkar dar 7:30 atangin programme tan nise tih rel a ni a, Siaha District Football Association (SDFA) Playground, Meisatla-ah hman nise, at home programme erawh inkhawm ban chawhnu lamah Circuit House-ah hman a ni thung dawn a ni. Khuallian atan Siaha DC, Pu VL Hruaizela Khiangte nise tiin hnam puanzar pawh pharhna hun a hmang dawn bawk a ni. Department hrang hrangte mawhphurhna insem niin Pathianni a nih avangin National Anthem erawh Sound track play tura rel a ni a, India ram ni pawimawh Republic day chu urhsun taka hman tura rel a ni.