3639/2024-2025

Siaha, 3rd December, 2024: Vawiin chawhma dar 10:30 khan District Social Welfare and Tribal Affairs, Siaha buatsaihin I&PR Conference Hall, Council Vaih-ah 'International Day of Persons with Disabilities (Rualbanlote ni)" hman a ni a, Pu VL. Hruaizela Khiangte, Deputy Commissioner leh District Level Committee on Disability Chairman ni bawk chuan khuallian niin he hun hi a hmanpui.

Khuallian Pu VL Hruaizela Khiangte chuan thu sawiin ‘Khawvelin ni bik nei hiala hun a hmansak chu a pawimawh hle tihna a ni a, keini pawhin kan theih ang angin rualbanlote hi kan ngaihsakin kan duat tur a ni’ a ti. Rualbanlote ni pawimawh zia te, an dinhmun chawikan a tulzia te leh Election Commission-in Rualbanlote vote thlak chungchanga an dikna chanvo humhim sak a ngaih pawimawhzia te, rualbanlo ten vote an thlak ngei theih nana ramp leh hmunbik a buatsaih thin thu a sawi. Tin, Rualbanlo (Benchmark Disabilities) te tan Sorkar hna lakah 4% Job reservation a awm thu leh Siaha District atang ngei pawha rualbanlo Officer kan neih tawh thu te a sawi bakah, Rualbanlote hian anmahni hrethiam a, an dinhmun chawikanna atana puitu an mamawh zia a sawi lang tel bawk.

Tin, Khuallian hian Kohhran, NGO hrang hrang hruaitute leh Sorkar hnathawkte Rualbanlote dinhmun chawikannaah an pawimawhzia a sawi bakah, Rualbanlote len vena khawtlang leh kohhran din tura State sorkar mai bakah District Level committee in hma a lak mek thu te a sawi bawk. Sawrkar hmalakna a theih dan kawng kawnga tawiawm turin kalkhawmte a sawm nghal bawk a ni.

Rualbanlote niah hian Resource Person Pu R. Lalmalsawma, Coordinator IE, Samagra Shiksha, Siaha District chuan Rights of Persons With Disability Act 2016 (rPwD Act, 2016) chungchang kal khawmte hnenah zirtirna a nei a. rPwD Act in a huam rualbanlohna chi hrang hrang a sawifiah bakah, an dikna chanvo an hmuh ngei theih nana sorkar, kohhran leh pawl hrang hrang hruaitute mawhphurhna a sawi lang tel bawk. Vawiin programme hmang tura "Rualbanlo" kal khawm zawng zawngte chu District Social Welfare and Tribal Affairs Office, Siaha chuan Blanket a hlan theuh bawk a ni.