No.3989/2020-2021   

Siaha, August ni 10 :  Vawiin chawhma dar 10:30Am  khan District Child Protection Unit, Siaha buatsaihin Siaha District chhunga Sponsorship leh Foster Care tanpuina dawngtu naupang leh nu leh pate tan Sensitization on Sponsorship & Foster Care Programme chu DCPU Hall, Siaha-ah hlawhtling taka hman a ni. He hun hi Nula H. Lalnunhriatpuii, Member, Sponsorship and Foster Care Approval Committee (SFCAC) chuan a kaihruai a ni.

Vawiin hun hmanna a khuallian Pu Lungmuana Hrahu, President, KTP Headquarters, Evangelical Church of Maraland (ECM), Siaha chuan thu sawiin, "Tuna naupangte hi kan ram hruaitu ropui tak tak an la ni thei a ni, " tiin, naupangte chu nu leh pate thu awih tur leh thahnemngai taka lehkha zir turin a fuih hlawm a. Naupang nu leh pate pawh mahni indahhniam mai lo turin leh harsatna karah pawh mahni fate mipuitling an nih theihna atana beidawng lova tan la zel turin a chah hlawm  bawk a ni. 

Rev S. Vabeikhokhei, ECM Meisavaih Bialtu Pastor chuan hunserh a hmang a. Chairperson Nula H. Lalnunhriatpuii chuan Programme buatsaih a nih chhante sawifiahna hun neiin kum 2020-2021 chhung hian Siaha District naupang 42 te hnenah thla tin Rs 2000/- (Cheng sanghnih) pek mek an nih thu a tarlang bawk. 

Nula Ephesi Hlychho, Mara Thyutlia Py (MTP) Miss ni lai mek leh Child Protection Ambassador nibawk chuan thu sawina hun hmang vein, naupangte entawntlak a nu leh pate awm a pawimawh zia leh naupangte ngaihthah a pawi theih ziate uar takin a sawi a, Dr. David Zaitinvawra, DCPO, Siaha chuan Sponsorship leh Foster Care dawngtu naupangte leh nu leh pa te tana hriattur pawimawh thil chi  hrang hrang leh fuihna thuchah sawina hunte a hmang ve bawk a ni. Nula S. Carosthene chuan kalkhawmte zaia awiin, Pu Teddie T. Lalnunrema, Social Worker, DCPU, Siaha chuan kalkhawmte hnenah lawmthu sawina hun hmangin he hun hi a titawp a ni.