No.7278/2020-2021 

Tukin zing dar 7:30am khan Hmeichhe hleilenna(Domestic or any violence) tuarte tlukluh lailawkna tur (SAKHI) ONE STOP CENTRE(HMEICHHE RÛN) hawnna programme tawi hman niin, Pi Lalhmingi,CDPO in programme a kaihruai a, Pi P.Chaki,President in hunserh a hmanga, Minister Dr.K.Beichhua chuan khuallian niin, cheng nuai 48 senga sak (SAKHI)ONE STOP CENTRE (HMEICHHE RÛN),New Siaha, AR Road a mi chu a hawng ta a ni.

Minister chuan thu sawiin, Social welfare department hian nu pum chhunga kan awmlai atangin kum Upa kan nih thlenga min enkawlna tur programme hrang hrang a nei a. Ruihlo ngai leh hmeichhe humsualdai te, hleilenna tuar te, pianphunga rualban lo te enkawlna tur pawh a nei vek a ni. Infrastructure lama pawh Anganwadi atangin University thlengin kutthlakna tur kan nei a ni, a ti.Minister chuan kan hun lai te khan POSHAN ABHIYAN scheme te hi lo awm hman ta se, tun ai hian ka pumrua pawh a tha zawk ngei ang, a ti. Minister chuan One Stop Centre hi Hospital leh Police Station hnai awm tura tih a ni avangin, In hmun kan zawng buai nasa a, kan harsatna hria in Pu Lengerha'n phal takin a ram a lo donate a, amahin In hi sa nghalin, Estimate aia lianin, zopa chhiara chhawng 2 in, tha deuh vin a lo sa a, achungah hian ka lawm tak zet a ni. OSC hi NGOs, Police, Medical leh concern department te tang hova enkawl tur a ni a, kan hmeichhe hleilenna tuar ten an hman tangkai ngei theihnan hnem ngai takin i thawkho ang u, tiin ngenna a siam bawk.Minister chuan hmeichhe hleilenna tuar te bakah hmeichhe humsualdai te awmna tur SWADHAR GRE pawh New Siaha Vety kawn,Pu Rohmunga Building-ah hawn a ni tawh thu a tarlang bawk.

Nl.Imelda Zomuanzuali,Centre Administrator,OSC chuan OSC staff te inhmelhriattirna neihin, OSC chungchangah report a pe nghal bawk. Report-ah chuan, OSC hian amah puala building a nei hma atang tawhin, DC office quarter hawhin,2019 August thla atanga an lo run tawh thu a tarlang a. Tuna building thar hian vawikhatah client 5 a dawng thei a ni, a ti.

Imelda chuan sawiin,OSC hi hmeichhe hleilenna tawk, pan tur hre lo te tana an tlukluh lailawkna tura a ni a, ni 5 leh zan 5 an awm thei ang. OSC a an tlukluh hian counselling te lo pein, an ei leh in bakah hmeichhe mamawh thil Basic needs( Sahbon, Shampoo, Diaper etc..) pawh a thlawn veka pek an ni. Legal Aid leh First Aid pawh an mamawh anga pek an ni a.OSC atanga an chhuah hunah pawh follow up programme a awm a, an court case te pawh an la buaipui sak zel thin a ni, a ti. OSC-ah hian Nu in a fa te pawh a lo tlukluh pui thei a, hmeichhe naupang tan kum bi thliah awm lovin, mipa naupang erawh kum 8 chin hnuailam chauh an lo tlukluh pui theih thung a ni, tih a tarlan bawk. Tunah hian OSC ah hian thawktu 9 an awm mek a ni.

Tukin OSC hawnna Programme tawi hi lawmthu sawina in Pu Kesavan R,IAS,District bawrhsap leh OSC Managing Board Chairman ni bawk chuan a ti tawp ta a ni.