No.7279/2020-2021

Nimin tlai khan Deputy Chief Minister Pu Tawnluia chuan Luangmual Industrial Growth Centre(IGC) chhunga inkalpawhna kawngpui te ( Internal Road) leh a panna kawngpui ( Approach Road) NEC sum leh state sum Rs 923 lakh(NEC Rs 830.70 lakh + State share Rs 92.32 lakh) hmanga thuam that a hawng. IGC kawngpui hawnna inkhawm hi I.B. Courtyard, Luangmual IGC-ah neih a ni a. He hunah hian Aizawl West I bialtu Pu Zothantluanga, MLA leh Vice Chairman, Manpower Development ni bawk pawhin Deputy Chief Minister hi a tawiawm a ni.

Luangmual IGC approach road leh internal road thawm that hawnnaah hian Deputy Chief Minister Pu Tawnluia chuan Luangmual IGC chhunga inkalpawhna kawng te leh a panna kawng chu sawrkar hmasa lama siam tawh a ni thu a sawi a. Helai hmunah hian sawrkar chuan Industry din mek te leh la din tum te tan kawngpui tha a pawimawh zia hriain UD&PA atangin kawngpui awm mek te thawm that nan hmalak a ni a. Hnathawh nan NEC atangin sum hmuh a ni, a ti. Kawngpui tha a awm loh chuan hmasawnna a chak thei lo a. "Hei hi kan Chief Minister hian a hre chiang em em a. A hmalaknain Mizoramah kawngpui tam tak siam a ni tawh a. Tuna kawngpui, Commerce & Industries Department enkawl mek IGC huam chhunga mi siam that a ni pawh hi hmasawnna pawimawh tak pakhat a ni a. Helai hmuna Industry siama eizawng mek te leh enterpreneur rawn inbunluh tum te tan pawh a tangkai hle turah kan ngai a ni", a ti. Tunhmain sawrkarin hmasawnna ruhrel a din dawnin state pawn lama mithiam te rawih thin an nih thu te leh rualawh a nat thin thu a sawi a. Tunah erawh chuan heng hna thawk tur hian Mizoram a mi ngei consultancy firm tha tak tak an awm ta chu hmasawnna pawimawh tak a nih thu pawh a sawi bawk a ni.

Luangmual IGC panna kawng dung, a zau zawng(width) 3.75 Mtrs,  Km 1.48  asei leh IGC chhunga inkalpawhna kawngpui, a zau zawng(width) 3.75 Mtrs, Km 10.73 a thui siam thatna leh black topping na atan bakah Retaining Wall, Culvert leh Side Drain siamna atan hian North Eastern Council(NEC) leh State sum tangkawp atangin  Rs 923.00 lakh hman a ni. He lai kawngpui pawimawh tak hi siam that a nih hnu hian IGC chhungah  hian industry a din belh nual niin helaia hma la mek te chuan an sawi a ni.

Deputy Chief Minister Pu Tawnluia hian Luangmual IGC chhungah hian Smart City Project hnuaia Rs 12 Crore senga Aizawl Smart City Ltd in a thawh tur Music City Project hmunhma pawh a enfiah a. He hunah Er Lalrothanga, CEO, Aizawl Smart City Ltd leh a thawhpui ten an tawiawm a ni.

Luangmual IGC kawngpui hawnna inkhawm hi Pu H.Lianzela, Director, Urban Development & Poverty Alleviation Department (UD&PA) chuan a kaihruai a. Pu HVL Zarzoenga, Joint Director, UD & PA in Technical Report a pe a. He hunah hian Pu T.C. Pachhunga, Vice Chairman, Mizoram Sports & Tourism Board leh sawrkar mi pawimawh te bakah khawtlang hruaitute pawh an tel a. Huntawp chu Pi Rita Lalnunmawii Pachuau, Joint Director, UD&PA in a khar thung a ni.