145/2022-2023
Siaha; the 13th April,2022: Vawiin chawhma dar 11:00Am khan DIPRO office,Siaha leh Siaha Fire Station tangkawpin kangmei chungchang media mite tana zirtirna ‘Special Training On Fire Safety And Fire Prevention for Media Personnel’ an buatsaih.

Training hawnna inkhawm hi Pu N.Vabeiratlua,DIPRO in kaihruaiin, Pu B.Sangtlunga,LFM in Keynote Address a sawi a, Pu CZ Hluna'n hunserh a hmang.

Fireman Pu Vanlalpeka leh Pu L.David Vungzaliana,Siaha Fire Station te chuan resource person niin, Siaha MJA member te Training an pe a ni.

Training-ah hian kangmei chhuah theih dan leh a hlauhawm dan te, leh fimkhur dan tur kawng hrang hrangte zirho anih bakah fire extinguisher hman dan te zirho a ni.

Kum 2021-2022 khan Siahaah kangmei F&ES tena an thelh ngai tum 8 awmin; chenna in kang pakhat leh ram kang hmun 7-ah a awm a ni.

Siaha Fire Station-ah thawktu, Fireman 7 tiamin, an vaiin mi 11 an awm mek a. Kangthelh motor (fire tender) 2 a awm bawk.

Vawiin Training-a Kangmei laka mipuite kan him tlan zawk nana hriattur pawimawh tarlan te chu:

1. In kan chhuahsan dawn emaw, kan mut dawnah te kan inchhungah leh kan inbulah kangmei tichhuak thei thil a awm leh awm loh uluk takin enfiah thin tur a ni.

2. Petrol, diesiel, khawnvartui te hi mei atanga hla taka dah thin tur a ni.
3. Mombati, bati te inchhung parda, puanzar leh thosilen bulhnai-ah te chhit loh tur a ni.
4. Thuka meichhem te kalsan dawnah uluk taka tihmit thin tur a ni.
5. Vawk chaw chhumna atang hian kangmei a chhuak duh viau a, kalsan dawnah uluk takin mei tihmit thin tur a ni.
6. Electric wiring tha lo avangin kangmei a chhuak nasa hle a, electric wiring te uluk taka endik thin tur a ni a, a thiamte chauh wiring khawih thin tir tur a ni. Electric hmanrua tha chauh hman thin tur a ni.
7. Ar vulhna a current kan pawhluh thin hi uluk takin endik reng thin tur a ni.
8. Electric hmanrua Heater, cooker, istiri etc te hi on chungin kalsan loh tur a ni a, hman zawhah plug atangin phawi zel tur a ni.
9. Kan in bul hnaite uluk takin tihfai thin tur a ni a, kangmei ti chhuak thei bawlhhlawh leh thil kang awlsam chite inbulah chhehkhawm teuh loh tur a ni.
10. Gas cylinder kan thlak dawnin a bul hnaiah mei tih nun loh tur a ni.
11. Meizial bung a nung chungin paih mai mai loh tur a ni.
12. Kangmei a lo chhuahin chiai mai lovin, rang takin Siaha Fire Station phone No. 03835-223085
leh Mobile no:9612230834 ah hriattir vat tur a ni.

Pu M.Baithai, President Siaha MJA chuan lawmthu sawina in vawiin Training programme hi a khar ta a ni.