2246/2026-2027

Siaha, the 17th September, 2026: Siaha District chhunga Swachhata Hi Seva (SHS) 2026 Campaign kalpui dan tur sawihona leh a hawnna (Launching) programme chu vawiin khan DC Video Conference Hall, Siaha-ah neih a ni a, District Bawrhsap Pi Saizikpuii chuan SHS 2026 Campaign chu District chhunga kalpui tan turin a hawng nghal.

District Steering Committee on Swachhata Hi Seva 2026 Chairman leh Addl DC nibawk Pu Abraham Beirazi Khithie kaihhruaiah hian Swachhata Hi Seva 2026 Campaign chhunga hmalakna tur hrang hrang sawiho niin, nikum lama hmalaknate thlir letna neih a ni bawk.

District Bawrhsap Pi Saizikpuii chuan faina chu a pawimawh hle a, ‘mahni in leh lo faina kan ngai pawimawh ang hian khawlai leh a chhehvel faina pawh kan ngai pawimawh tel theuh tur a ni’ a ti. Faina chu inzirtir theih a ni a, naupangte atanga nunpui theih a ni tiin, bawlhhlawh thliar hrang leh tangkai taka hmang thiam tur te, tawih thei lo (single-use plastic) hmang lo tur leh recycling uar zawka inzirtirna kalpui a tul hle a ni, a ti.

Pi Saizikpuii chuan Siaha District chu nikum lamah Mizoram pum huap faina inelnaah Pakhatna a ni thei chu lawmawm a tih thu sawiin, kuminah pawh theihtawp chhuaha tan la tur leh Department hrang hrang thawhhona tha tak hnuaiah Pakhatna an nih leh ngei a beisei thu a sawi a, thawhhona tha tak neih chhunzawm zel turin a ngen nghal bawk a ni.

Swachhata Hi Seva 2026 hi September ni 17 atanga October ni 2, 2026 chhunga kalpui tur a ni a, Swachhata Mein Sahbhag; Swachh Bharat, Viksit Bharat ( Whole of Government, Whole of Society) tih thupui hmanga kalpui tur a ni.