2242/2026-2027 

Dated Khawzawl, the 17th September, 2026 : Vawiin khan Khawzawl Deputy Commissioner Pu K. Vanlalthiana hovin DC Conference Hall-ah khawtlang tihfai kawnga beihpui thlakna ‘Swachhta Hi Seva’ campaign hawnna inkhawm neih a ni a. District Urban Development Officer  (DUDO) Pu Chandrakant Bagoria chuan hun a kaihruai.

Khawzawl DC Pu K. Vanlalthiana chuan thu sawiin, faina leh thianghlimna hi kan nunpui a ngai a, fai ringawt hi a tawk tawh lova, him zawk leh felfai zawka bawlhhlawh sawngbawl a pawimawh tawh tih a sawi a. Solid Waste Management Rules 2026 dan angin bawlhhlawh chi li-a thliar a ngai tawh tih midang hnena hrilhhretu ni turin zirlai naupangte a sawm a. Khawzawl District chhungah hmuh hrehawm khawpa bawlhhlawh chhekkhawlna hmunte a awm lo chu lawmawm a tih thu sawiin, khawtlang vawn fai kawnga tlawmngai pawlte hmalak tawhna-ah lawmthu a sawi a. Khawzawl town chhunga Village Council sawmah (10) bawlhhlawh chi li-a thliar tur niin, bawlhhlawh khawntuten kawtkaihah an khawn dawn tih a sawi a. Faina kawngah hmahruaitu kan nih theih nan theihtawp chhuah turin kalkhawmte a sawm a, Swachhta Hi Seva campaign hi a hawng nghal a ni.

District Urban Development Officer  Pu Chandrankant Bagoria chuan Swachhta hi Seva campaign thil tum sawifiahin, Mizoramah pawl hrang hrang leh zirlaiten tlawmngaiin khawtlang tihfai hnatlang kan nei thin chu fakawm a tih thu a sawi a. Khawtlang tihfai hi sawrkar tih tur chauh a ni lova, mi tin mawhphurhna a ni, a ti a. bawlhhlawh felfai zawka sawngbawl a nih theih nan Khawzawl Solid Waste Management Centre chu sak zawh tep a nih thu a sawi bawk.

Er. Liantluanga Chohte, Sr. Executive Engineer, PHED, Khawzawl WATSAN Division pawhin thu sawiin, PHED chu thingtlangah faina lampang enkawltu an nih thu a sawi a. He campaign chhunga Khawzawl District chhung khaw hrang hranga activity an neih turte a sawi a. Bawlhhlawh chi li-a thliar hran tur chungchang inhrilhhriatna hun chu school hrang hrangah an nei tawh a, in tinah la neih chhunzawm tur a nih thu a sawi bawk.

Thusawitu dang Khawzawl Addl. Deputy Commissioner Pu K. Zorammuana chuan India ramah Mizoram chu state fai ber pawl a nih thu sawiin, kan hmingthatna hi vawng nung zela, ram changkang zawkte anga bawlhhlawh felfai taka paih hi zawm reng turin kalkhawmte a chah.

Swachhta Hi Seva campaign hi September 17 – October 2, 2026 chhung neih tur a ni a. Vawiin hunah hian kalkhawmte chuan khawtlang vawng fai tura intiamna ‘Swachhta Pledge’ a rualin an la a. Sub-Htqrs YMA, MUP leh MHIP aiawhte bawkah Govt. Khawzawl High School leh Higher Secondary School atangin zirlai thahnem tak leh zirtirtute an tel a ni.