2247/2026-2027

Kolasib, the 17th September, 2026: Vawiin chhun dar 12:00 khan DC Conference Hall, Kolasib-ah 'Swachhata Hi Seva 2026' chu Pi B. Malsawmtluangi, Addl. Deputy Commissioner, Kolasib chuan a hawng. He hun hi Pu H. Lalramliana, DUDO, Kolasib chuan a kaihruai a ni.

He hun hawngtu Pi B Malsawmtluangi Addl DC chuan Swachhata Hi Seva chu Mizoram district hrang hrangah a rualin vawiinah hawn a nih thu a sawi a. Faina kawnga inelna tha tak a nih thu sawiin, hun hmangtu kalkhawmte chu anmahniah pawimawhna an neih theuh thu leh an mawhphurhna theuhvah theihtawp chhuah turin a chah a ni. Kolasib chu khaw bal lutuk a nih loh laiin faina inelnaah Top 3-ah pawh a la lan ngai loh chu cho-na a neih a tul thu sawiin, district dangte pawhin pakhatna dinhmun an hauh theih chuan Kolasib pawhin a hauh ve theih a ni, a ti.

Bawlhhlawh sawngbawl dan chu kawng hniha (two ways waste solution) kalpui thin a nih atangin tunah chuan chi li (4 ways)-ah thliar a ngaih tawh thu a sawi a. Hengte hi mipuite tana tha zawk tur a nih avangin sorkar ruahmannate tha taka zawm a pawimawh hle a ni, a ti. Solid Waste Management Centre chu Dihmunzawl-ah neih a nih thu leh Vairengte, Bairabi leh Kawnpui-ah te pawh sak mek a nih thu a tarlang bawk.

Hawnna inkhawmah hian Swachhata pledge lakna neih nghal a ni a. Pu Isaac Malsawmtluanga, SDC, Kolasib hnen atangin SWM Rules leh PWM Rules chungchang ngaihthlak a ni a, Pi Lalkhawngaihi, Inspector of Sanitation, DUDO hnen atangin bawlhhlawh chi lia thliar hran (Four-Way Waste Segregation) chungchang zirhona leh video entirna neih a ni bawk.

Swachhata Hi Seva 2026 pual hian September ni 17 atanga October ni 2, 2026 thleng hun hman a ni dawn a. He mi chhung hian faina beihpui thlakna hrang hrang leh inzirtirna (awareness campaigns, cleanliness drives) te Kolasib district chhungah kalpui a ni ang.