2248/2026-2027

Dated Champhai, the 17th September, 2026 : Vawiin khan ni 15 chhung awh tur mipuite hnena faina inzirtirna ‘Swachhata Hi Seva’ (SHS) campaign hawnna leh Solid Waste Management Rules 2026 inzirtirna hun chu I&PR Auditorium, Chanem Building-ah neih a ni a. Champhai District Bawrhsap Pu Mohammed Aaquib chuan a hmanpui.

Champhai DC Pu Mohammed Aaquib chuan thu sawiin, faina lama hmasawn hi India hnam pa Mahatma Gandhi hmathlir a ni a, he campaign-in a tum chu mipuia innghat chunga faina lama hmasawn a ni, a ti a. Faina hi kan nunphunga kan sengluh a tul thu a sawi a. Faina kawngah sawrkar hmalakna a tawk lova, mipuiin hma an lak a ṭul zawk tih sawiin, hemi tur hian kalkhawm khawtlang hruaitute leh tlawmngai pawlte chu thawhpuiah a sawm. 

Pu Mohammed Aaquib chuan he campaign chhunga hmalakna tur hrang hrangte chu faina lama awmze nei tura hman tangkai ngei a nih beiseiin, thangthar leh naupang ten faina an nunpui theihna tura inzirtirna atan hman theih nise a duh tih a sawi a. Swachhata Hi Seva hian faina kawngah Champhai khawpuia hmasawnna thlentu ni ngei se a duh thu a sawi bawk.

SHS hawnna hi Champhai District Urban Development Officer Pu Ngulzathuama chuan a kaihruai a. Ni 17 Sept atangin October ni 2 chhunga hmalakna tur hrang hrang, mipuiin faina an nunpui theihna tura hmachhawp te an inzirtir nghal a ni.

Hawnna inkhawmah hian Champhai District Department hrang hrang hotute, Champhai khawpui chhunga Local Ambassador, VC leh tlawmngai pawl aiawhte an tel a ni.