2249/2026-2027

Dated Serchhip, the 17^th September 2026: Vawiin khan Swachh Bharat Mission hnuaia, India ram pum huap kar hnih awh faina beihpui thlakna ‘Swachhata Hi Seva 2026’  khuhhawnna hun Serchhip DC Pisapui Hall-ah hman a ni a, he hun hi DC Office, UD&PA leh PHE te bultuma buatsaih niin, District Urban Development Officer Pu Gaston Vanlalhriatpuia’n a kaihruai a, Serchhip District Bawrhsap Pu Paul L. Khuma’n khuallian niin a hawng.

Bawrhsap chuan kalkhawmte fuihna thu sawiin, faina hna thawh chu rawngbawlna dik  tak a nih thu a sawi a; faina chu inthununna leh mi dangte zahna (respect) lantirtu, darthlalang anga mi nihna diktak lantirtu a nih thu sawiin, khawtlang nuam leh hrisel, tu chhuan lo awm leh zelte tan pawha ram nuam siam turin, mi tinte chu thawh hona tha neih puiah a sawm a, faina atana mahni zawn theuha ke pen a, ’collective participation’ nei turin a sawm a ni.

Vawiin hun hmannaah hian Inspector of Sanitation, UD&PA Department Pu Obeda Lalhuliana’n ‘Swachhata Hi Seva’ kalpui dan tur a sawi a; District Coordinator, SBM (G), PHE Deptt. Pu Samuel Lallawmzuala hnen atangin Serchhip district-a faina kawnga hmalakna hrang hrang report ngaihthlak a ni a; Serchhip Town Joint VC Chairman Pu R. Sanghmingthanga leh Sr. EE, PHE Deptt. Pu Isaac Lalchhuanmawia ten thu an sawi bawk.  Report-a tarlan danin, khaw fai inelna Swachh Survekshan Grameen 2025 (result thar ber) -ah Serchhip District chu Mizoram-ah Pakhatna (1) an ni.

Vawiin hun hmannaah hian Department hrang hrang hotute, MJA, Khawtlang hruaitu VC, YMA, NGO leh zirlaite an tel a; Additional Deputy Commissioner Pi Dorothy Muansangi’n lawmthu sawiin hun hi a khar a ni.

Swachhata Hi Seva 2026 hi September ni 17 atanga October ni 2 thlenga ram pum huapa hman tur a ni a, a thupui  chu “Swachhata Mein Sahbhag, Swachh Bharat, Viksit Bharat” tih niin he campaign thil tum ber chu –mipui huapzo hmalakna, mipui zawng zawng telna leh thawh hona hmanga ram nuam leh thianghlim siam a ni. 

Swachhata Hi Seva 2026 neih chhunga hmalak dan tur tlangpuite:

-        Cleanliness Target Units (CTUs): Khawpui chhunga hmun bal, ngaihthah leh tihfai harsa lai bik – bawlhhlawh paihkhawmna, kawngsir bal, back lane, tuikhur leh mipui tamna hmunte thlan chhuah a, tih fai a, cheibawl a, hmun nuam leh tangkaia chantir.

-        Swachh Paathshala – Yuva for Swachhata: Thalaite faina kawnga hmahruaitu atana chherchhuah.

-        SafaiMitra Suraksha Evam Samman Shivir: Faina hnathawktute (SafaiMitra) te hriselna leh himna ngaihpawimawh a, an puala hun buatsaih.

-        Waste-to-Wealth leh Circular Economy tih hmasawn: Bawlhhlawh atanga sum lakluh dan kawng ngaihtuah leh hman hnu hman nawn emaw, thil dang tangkai atana siam (recycle & reuse) te uar a , eizawnna leh sumdawnnaa chantir dan inzirtir.

October ni 1 ah ‘Ek Din, Ek Ghanta, Ek Saath’ tiin India ram pumah faina hnatlang neih a ni ang a, October ni 2, Swachh Bharat Diwas-ah he campaign hi khar a ni dawn a ni.