2250/2026-2027

Dated Aizawl, the 17 September 2026: Vawiin khan Tourism Department changtu Minister Pu Lalnghinglova Hmar chuan Zo-hall, Tourist Lodge, Chaltlangah, Mizoram State Commission for Protection of Child Rights (MSCPCR) buatsaih, Mizorama Tourism ṭhangduang tak kara Naupangte himna ngaihtuah (Promoting Child-safe Tourism in Mizoram) tih thupui hmanga Inrawnkhawmna hun (Consultation Meeting) chu khuallian niin a hawng.

He hunah hian khuallian Tourism Department Minister Pu Lalnghinglova Hmar chuan thusawiin, MSCPCR-in Mizorama Tourism ṭhang chho mek thlir chunga ngaihtuah ṭul tak naupangte himna chungchanga inrawnkhawmna hun a buatsaih chu lawmawm a tih thu a sawi a. ‘Ram hmasawn ang zelin chona hmachhawn ṭulte a inthlakin, chumi hrulah chuan ngaihpawimawh ṭulte pawh a inthlak tel’ a ti a. Mizorama Khualzin lo lut pun chak dan tarlangin, nikum 2025-a Mizorama khualzin lo lut zawng zawng chu mi-841322 lai an nih thu leh kuminah chuan July thla thleng chauhva khualzin lo lut zat pawh 612463 zet an ni tawh tih a sawi a. Hemi ngaihtuah hian Mizoramah chuan State chhunga chengte aia tam mah khualzin lo lut thei an ni tih sawiin, hemi karah hian naupangte himna ngaihtuah chu tihmakmawh a lo ni ta a ti.

Minister chuan khawvel hmun dangte ang thovin Mizoramah pawh Tourism avanga harsatna thleng ṭhin chu khel lova lo thleng ve reng thei a ni tih sawiin, chumi hmachhawnna kawngah chak taka hma la tur chuan Sawrkar chu kohhran, tlawmngaipawl leh Khawtlang mipuite hnen ṭha taka a thawh ho a ṭul tih a sawi a. Mahni zawn ṭheuhvah sawt zawka sawrkar hmalaknate tichaka venpui tak tak theitu chu khawtlang mipuite an ni tih hriatsak hram tura kalkhawmte chu chahin, Hmingthanna zawng zawngah hmingṭhatna a awm kher lo tih hre chunga Consultation Meeting chu rah ṭha tak chhuah khawpa hmang ṭheuh turin duhsakna a hlan nghal bawk.

Consultation Meeting hi hun thuma ṭhen niin, hun hnihnaah hian thupui thlan chhuah bikte hmangin mithiam ten kalkhawmte an zirtir a. ‘Mizoram Tourism: tun dinhmun, la ṭhangduang zel tur lai leh hmathlirte’ tih thupui hmangin Pi Rachel Lalrinhlui, Deputy Director, Directorate of Tourism chuan thusawiin, Child and Adolescent Labour, Prohibition and Regulation Act 1986 hmangin Pu R. Lalṭanpuia MSCPCR member chuan thu a sawi a. ‘Naupangte dikna chanvo leh a kaihhnawih dan leh hraite’ tih thupui hmangin Pi Priscilla Lallawmsangi, Legal Officer, MSCPCR chuan thu a sawi bawk a. Hun thumnaah hian kalkhawmte aṭanga rawtna leh ngaihdante ngaithlak a sawiho nghal a ni a. MSCPCR chuan heng rawtna lutte hi thlifimin Sawrkarah rawtna a thlen leh dawn a ni.

Vawiina Inrawnkhawmna hunah hian MSCPR aiawh leh Sawrkar Department hotute bakah MKHC hruaitute leh Tlawmngaipawl: Central YMA, MHIP aiawhte leh  sawm bik mi ṭhahnem tak an tel a. Pu Lallianzuala Chawngthak, Superintendent, MSCPCR chuan lawmthu sawiin hun hi a khar a ni.