1618/2023-2024

Dated Siaha 23rd August 2023 : Vawiin khan kumin Teachers' Day September ni-5 a hman dan tur sawihona neiin District Working Committee-te chuan DC Mini Conference Room-ah thutkhawmna an nei a, thutkhawm hi Pu Lalhmunsanga Hnamte District Bawrhsap leh Chairman, District Working Committee ni bawk chuan a kaihruaia a ni.

Pu Lalhmunsanga Hnamte chuan zirtirtute chu ram leh hnam tana mi tangkai leh chhuanawm, ram hruaitu chhertu ber an ni a, zirlaite tan chauh ni lo in mitin tana hna pawimawh leh tangkai tak thawktute an nih angin chawimawi an phu hle a ni, a ti. Zirtirtute Ni lo thleng mai tur pawh uar leh phur takin hman a tul tih tarlangin zirlai, nu leh pa, khawtlang mipuiten urhsun taka hmang turin a ngen a, he ni hlawk leh tangkai taka hman a nih theih nan mawhphurhna nei zawng zawngte theihtawp chhuah turin a chah bawk.

Pu T. Chatlua, Addl. DPC hnen atanga State Working Committe- in kumin Zirtirtute Ni lawmdan tur a rel te ngaihthlak a nih hnuin hetiang hian Siaha District chhunga Zirtirtute Ni lawmdan tur rel nghal a ni.

1. School tinin Mahni School-ah theuh theih ang tawka uarin lawm nise, khawte zawk a huhova lo hmang theite chuan SMC/VC/NGO-te kaihhruainain hmanho nise.

2. Siaha khawchhung hmun lunlaiah Banner tar nise, tarna hmun tur leh tartu tur chu- Traffic point leh Meisavaih - DC Office (Mizo version), AOC- Siaha college, Vety kawn leh Siahatla - DPO Samagra (English version), kawn remchang dangah- DEO (photo booth), New colony Bus station- MADC (M/S), Congress Bhavan bul - MADC (P/S).

3. Zirtirtu chawl tawhte leh National/State Award-dawngte chu an awmna veng/ khuaa school lian berin lo sawm se.

4. Zirtirtute Ni hi uar zawk leh hung taka lawm a nih theih nan VC, SMC leh NGO-te leh Zirtirtute lo inberawnin ruahmannna lo siam tura ngen.

5.Zirtirtute Ni pual hian Deputy Commissioner, Siaha in thuchah lo siam se, School tinah zirlaiten chhiar chhuah tir ni se.

6. National Foundation for Teachers' Welfare (NFTW) Fund- thahnem zawka thawhkhawm a nih theih nan leh zirtirtu zawng zawngin an thawh ngei theih nan DEO leh Sr. EO, MADC ten theihtawp lo chhuah se.

7. Zirtirtute Ni chu zangkhai zawka hman a nih theih nan Circular chhuah nise tih a ni bawk.

Pu Lalhmunsanga Hnamte District Bawrhsap leh Chairman, District Working Committee ni bawk chuan lawmthu sawina neiin thutkhawm hi a khar a ni.