2453/2026-2027

Siaha, 29th September 2026 : Agricultural Technology Management Agency (ATMA) leh District Agriculture Office (DAO) tangkawp buatsaihin September Ni 29 khan tel siamna tur thlai chi semchhuahna hun hman a ni a, leitha siamdan inzirtirna neih nghal a ni.

‘Within District Training cum kick off Programme on Chulrih-Oilseeds Cultivation and Seed Distribution’ hi ATMA Project Director Pi Elizabeth Khaimeichho kaihhruaina hnuaiah hman niin, District Agriculture Officer Pu R. Lalrinawma chuan thu sawiin thil ei dawn apianga mamawh tel a intodelh chu tih makmawh a ni tiin thlai atanga tel sawrchhuah lamah hma lak chu an tum ber a ni thu a sawi a, tel sawrchhuah theihna thlai te chu enkawl an hautak loh thu leh thlai dangte ruala china enkawl hranpa kher a ngaih loh thu a sawi.

Vawiina hun hman ah hian Assistant District Agriculture Officer Pu John Lalnunsanga’n sawrkarin leitha a pekchhuah thin danah kuthnathawktuten an hriattur pawimawh hrang hrang zirtirna a pe a, KVK-a Subject Matter Specialist (Agronomy) Pu Isaac Lallawmkima chuan National Mission on Natural Farming hnuaia hriattur pawimawh hrang hrang Community Resource Persons (CRP) te hnena zirtirna a pe nghal bawk.