No.2686/2021-2022
Aizawl; the 22nd October,2021 : Vawiinah khan DRDA conference Hall-ah Pradhan Mantri Vandhan Yojona Scheme hnuai atanga tharchhuah Aieng phut, Hmarcha Phut leh Hmunphiah ( Organic Turmeric Powder,Chilli Powder & Broom) chu zawrh chhuah theih turin district bawrhsap leh Chairman Vandhan mission ni bawk Pu Kesavan R,IAS chuan a tlangzarin, Pu B.Lalchhawntluanga,PD, DRDA leh Nodal officer,Vandhan Mission, Siaha district ni bawk chuan tlangzarh inkhawm a kaihruai a ni.

PM Vandhan Mission hi Ministry of Tribal Affairs, TRIFED hnuai a mi niin, Mizorama Cooperative Society chu Nodal an ni. Siaha District-ah erawh DRDA, Project Director hi Nodal officer a ni thung.

Pi C.Galilee,Addl.PO &Supervisor Vandhan Mission chuan Siaha district hnuaia PM Vandhan Yojona scheme kalpui dan leh hmalak tawhna hrang hrang leh hmachhawp te report a pe a. Vandhan mission 1st Phase hnuaiah Thingtlang khua 25 leh Self Help Group 75 awmin,Kuthnathawktu( gatherer) 1500 an awm mek a ni, a ti. Aieng leh Hmarcha te hi leitha(Fertilizer) tel lova tharchhuah ngei a ni tih test paltlang vek a ni a. Thlai pakhat test tir nan leh organic certificate hmuh nan hian a test tur thlai a zirin Rs.25000-50000/- vel sen angaia, DC hma laknain Delhi lama test tir a ni.Nakum atang chuan Sawhthing phut ( Chhaolo leh Lobo khua te product ) neih hman beisei a ni bawk. Nikum khan Chhaolo leh Lobo khuaa SHG Member 300 hnena sawhthing chi tha chi Mi pakhata kg 50 theuh pek an lo ni tawh a. Anchiri hi Lopu leh Phura ramah chin a ni a, kumthar lama product neih hman an beisei a ni, a ti a. Tunah hian Vandhan second phase tan chhomek niin, Gatherer 3300, SHG 165 leh thingtlang khaw 27 a tuam leh dawn a. Heng khaw hrang hrang enkawl tur hian Vandhan Surveyer 8 an awm a, surveyer ho hian thlatin an bial lama hmalakna an vil thin a ni, a ti bawk.

Bawrhsap Pu Kesavan chuan tlangzarhna thusawiin, Vandhan mission chu Ramngaw hausakna haichhuahna mission a ni a.Zawrhsum a chang thei thlai(Cash Crop) bakah Kan district ramngaw a tualto thlai leh hnimhnah zawrhsum a chang thei te zawnchhuah a, chin puna, hlawk zawka zawrh tura sawngbawla, a market zawn a, kuthnathawktu income tihpun a, leirem rahtir a, an khawsak chawikan hi he Vandhan Mission thil tum a ni, a ti.

Vawiin tlangzarh Inkhawm zawhah hian DRDA Hall kawtah Aieng phut leh Hmarcha Phut 50gram ve ve a pack chu Rs.20/- a zawrhchhuah nghal a ni a. Hmunphiah pawh phiahkhat Rs.50 a hralhchhuah nghal a ni. Aieng phut leh Hmarcha phut pack te kar leh lamah chuan Dawrtina pekchhuah tum a ni a, Mara ram mipui ten kan district atang ngeia kan thil tharchhuah te hi hlut a, Made in Maraland Product ngei hi lo lei a, lo ei vek tawh turin Vandhan mission staff te chuan Siaha district mipui te an ngen bawk a ni.