No.2935/2020-2020

Vawiin chawhma dar 11:30am khan AH&VETY Office, Siaha chuan DVO office-ah Artificial Insemination in Pig programme tlangzarhna(launch) hun hman a ni. He A.I in Pig tlangzarhna programme hi Dr.Sahlu khaila,DVO in kaihruaiin; Pu N. Zakhai, CEM, MADC chuan khuallian niin programme a hman pui.

Khuallian Pu N. Zakhai chuan thusawiin; Kum tam tak hnua a vawikhatna atan AH&VETY office,Siaha in Artificial Insemination programme in kalpui thei tur hi ka lawm tak zet a, Pathian tanpuina leh DVO,VO leh Staff te thawhrimna rah liau liau a ni, ka lawmpui tak zet che u a ni, a ti. Khuallian chuan AH&VETY office hmalakna in hun reilo te-ah Siaha District in Vawksa-ah kan intodelh thuai beiseina sang tak ka nei a ni, a ti bawk.

Vawiin Vawk kah rai programme-ah hian Vawk vulh tui mi kalkhawm te hnenah Dr.Zapaw Azyu,VO,District Vety Hospital in Power point presentation hmangin History & Advantages of A.I tih thupuia hmangin zirtirna hun a hmang a. Dr.Lalrengpuii Sailo,VO,District Vety Hospital in A.I Process tih thupuia hmangin zirtirna hun a hmang bawk.

A.I. programme hi kum 2011 khan Satellite Boar Semen Station programme hnuaiah hma lak tan niin; infrastructure hi Cattle Breeding Farm,Siaha-ah din a ni a. Amaherawhchu PRRS hrileng avangin kum engemaw zat a hlawmchham hnuin; kum 2019-ah tharthawh leh a ni a. DVO office Complex-ah sawn chhoh niin; tunah hian a chi thlahtu tur Vawk Pa 2; Landrace leh Yorshire, nikum 2019 February tarik ni 23 a Lungpuizawl atanga a note a anlak chu puitling tawhin; a chi lak tan a ni tawh a ni. An enchhin nan July tarik ni 3 khan Vawkpa tha mi chi chu Vawkpuiah an lo kap tawh a; July thla tawp lamah hian a hlawhtlin leh tlin lo pawh a hriat theih dawn a ni. Vawkpa pakhat chi hian vawkpui 100-250 a kah rai thei a, tunah hian Siaha khawpuiah Vawkpui 280-300 vel awm mek a hriat a ni a.

Tluang taka A.I. hi kalpui zel a ni chuan he Vawkpa chi tha mi 2: Landrace leh Yorshire hian Siaha district chu vawk vulhna kawngah hmasawnna nasa tak a thlen a; vawksa-ah pawh kan intodelh thuai an beisei thu DVO leh VO te chuan sawiin; vawkpui kah rai tur nei chuan AH&VETY office-ah in report zel tur leh midang hnenah pawh hrilhriat zel turin Vawk vulh tui mi kalkhawm te chu an chah bawk.

DVO Dr.Sahlu khaila chuan thu sawiin; Cancer patient ka ni a,DVO a thu tlak pawh niin ka inhre lo. Mahse hotuten min ringa; DVO a min dah hi Pathian remruatah ngaiin; Pathian rinchhanin kan kal mek zel a ni. Kar khatah Vawi 2 ( Monday&Friday) kei leh ka staff te chuan devotion kan hmang thin a.Siaha district mi leh sa ngei Vety Minister kan han neih leh zel te hi kan tawngtai chhanna-ah kan ngai hmiah a ni. Sub-Division atangin Kum 1977-ah Division puitlinga hlan chho tawh kan nih chungin; AH&VETY office,Siaha in hmasawnna em em nei lo a kan lo kal thin chu; tunah chuan Pathian tanpuina leh kan Minister Dr.K.Beichhua zarah kan office complex hmel lo danglam ta te pawh in hmu thei ngei ang. kan AH& Vety office in kan Siaha district district a hmasawnna kan thlen zual zel theih nan kei leh ka staff te hi min tawngtaipui thin turin kalkhawm te hi ka sawm che u a ni, a ti.