No.2934/2020-2020

Lawngtlai, Vawkhniahzawn thla ni 10, 2020: Fisheries Department chuan nimin leh vawiin khan Socio-Economic Development Policy (SEDP) kal tlangin Lawngtlai District chhunga sangha khawitute hnenah 50% subsidy-in sangha chi an sem.

Fisheries Department-in Lawngtlai District chhunga sangha khawitute hnena subsidy-a sangha chi an pek chhuah hi 90,000 vel a ni a. A man pumpui atanga a zatve chu Department-in tumsakin, beneficiary-te hian pakhat Rs 2/- (50% subsidy) zelin an khul a ni.

Sangha chi an pek chhuah hi ngha-sen (common carp) vek niin, 60-80 mm inkar vela lian a ni a. Tun hi SEDP hnuaia Fisheries Department-in Lawngtlai District-a hma an lak bul tanna niin, Lawngtlai District chu sanghaa intodelh turin hma lak chhoh zel tum a ni.

Lawngtlai District Fisheries Development Officer Pi Lalremsangpuii chuan vawiin, July ni 10 hi National Fish Farmers Day a nih angin, sangha chi an sem thei chu lawmawm a tih thu a sawi a. Lawngtlai District chhungah circle pali (4) - Bungtlang 'S', Chawngte, Lawngtlai leh Sangau circle-te an neih thu sawiin, he'ngah hian sangha dil siam mi 1060 vel an awm tih a sawi.