Vawiin chawhma dar 11:00Am khan Indian Chamber of Commerce, North Eastern Council, Ministry of DoNER ,Govt. Of India; DC office, Siaha leh BDO office, Siaha RD Block tangkawpin DC conference Hall-ah Workshop on Financial inclusion an buatsaih. Vawiin Workshop hi  MTP(H) aiawh te, MCHP(H) aiawh te, MSO(H) aiawh te, Loneitute, VC member te, sumdawng mi te leh SHG member  thahnem tak ten an chhim a ni.

Pu Bhupesh Chaudhary IAS, Deputy Commissioner  chuan khuallian niin  workshop hi a chhim ve a. Thusawina hun hmangin khuallian chuan  Financial inclusion pawimawhna sawiin, Mipui ten Bank facilities an hman tangkai theih nan leh hamthatna awm te mipui tam zawkin an hriat theih nana he workshop hi buatsaih a ni, a ti.

 Siaha district-a Bank  hrang hrang MRB,MCAB, SBI, HDFC te leh Social Welfare department atanga resource person ten sawrkar scheme chi hrang hrang pawimawhna leh Bank loan chungchang te mipui kalkhawm te hnenah hrilhriatna hun an hmang a. Pu Ngulzathuama, BDO, Siaha RD Block  hnen atangin PMSYM chungchang ngaihthlak a ni bawk. He pension scheme atang hian job card neite ( un-organised workers) pension hlawh Rs 3000/- thla tin kum 60 tlin hunah an lak theih tur thu te a tarlang bawk a ni.

Thusawi ngaihthlak zawh hian mipuite leh official-te nen sawi hona neih niin, Zawhna leh Chhanna session neih zui nghal a ni bawk.