New Delhi a cham mek Chief Minister Pu Zoramthanga chuan vawiin khan sawrkar laipui a Road Transport and Highways changtu Union Minister Pu Nitin Gadkari chu a pisaah hmu in Mizorama inkalpawhna tihhmasawn chungchang a sawipui a. Food and Agriculture Organization (FAO) Country Director Pu Tomio Shichiri chu hmu bawkin state chhunga FAO nena thawhho chungchang a sawipui bawk.

Union Minister Pu Nitin Gadkari hnenah Chief Minister chuan Mizorama kawng chhia siam thar ngai te leh sum mamawh te saiin, lei thuam that leh siam that ngai te a sawipui bawk.

Vawiin chawhma khan Chief Minister chuan United Nations peng pakhat Food and Agriculture Organization (FAO) aiawha India rama awm Country Director Pu Tomio Shichiri leh a thawhpuite a kawm bawk a. Agriculture leh horticulture lama state sawrkar leh FAO thawhdun theih dan tur sawiho a ni. Mizoram a chemical fertilizer hmang lova thei, thlai leh pangpar tharchhuahte organic certification pek chungchang te, heng thei rah leh thlai tharchhuahte hi an hlutna belhchhah tura sawngbawl chungchang te, hralhchhuahna kawng tha tak siam chungchangte sawi dunin, thalai lehkhathiamte leh entrepreneur ten horticulture hlawkna an hriat thar a, eizawnna atan mi tam zawkin horticulture farming an luhchilh chu pawimawh an tih thu an sawi bawk a. Heng zawng zawng atan hian hmanrua a inpuih a pawimawh thu Chief Minister hian a sawi bawk.

FAO leh Mizoram sawrkar tawngkawpin kuthnathawktute tan Farmer Field School (FFS) lo buatsaih tawh a ni a. Hlawk zawka serthlum leh lakhuihthei chin dan leh dahthat a sawngbawl dan te inzirtir niin, he hmalakna atan hian FAO atangin cheng nuai 18 hmuh a ni. Tuna state flagship programme atana FAO nena thawhho theih dan vawiin meeting-ah hian an sawi dun bawk a ni.

Chief Minister hi Planning Vice-Chairman Pu H. Rammawi, Mizoram House Resident Commissioner Ajay Chaudhry PHED Secretary Pu Amjad Tak, Planning Secretary Dr. Vanlalramsanga, Horticulture Director Dr. Elizabeth Saipari leh official dangten an tawiawm a.