4715/2024-2025

Siaha the 19th March 2025: Vawiin chawhma dar 11:00 khan District Civil Supply Office, Siaha buatsaihin DRDO Conference Hall, Siaha-ah World Consumer Rights Day-2025 hman a ni. Pu VL Hruaizela Khiangte, Chairman, Consumer Council, Siaha leh District Bawrhsap nibawk chuan khuallian niin he hun hi a hmanpui.

Khuallian Pu VL Hruaizela Khiangte chuan kalkhawmte chu World Consumer Rights Day chibai bukin mipui te’n mahni dikna chanvo an hriat a pawimawh a, nitin nuna mamawh thil, lei leh hralh chungchangah pawh fimkhur a ngai hle, a ti. Mipuite chu thil diklo thleng a awm chuan thuneitute hnenah ziaka thlen uar sauh sauh turin a chah. Sumdawngtute pawh danin a phal china hlep an neih chu lungawipuia mipui tan harsatna thlen lo turin a chah bawk. Consumer club member-te fuihna thu sawiin, khuallian chuan mahni tana chakai khawrh ni lovin mipui dikna chanvo an humhim a ni tih hriain khawtlang leh ram tan thawk sauh sauh a, mahni dikna chanvo hre lo tam tak awmte hriattir chu an kova tlaah ngaia, mitin dikna humhim tlang turin a chah bawk. 

Vawiin hun hmannaah hian Pi Mary J. Ngurnunmawii, Advocate chuan kum 2025 World Consumer Rights Day thupui “A just Transition to Sustainable Lifestyle” leh dan mit atanga consumer-te chanvo tih hmangin kalkhawmte zirtirna a nei. 

Prof. Chawngkhuma Chawngthu, President, District Consumer Union, Siaha chuan he hun hi a kaihruai a, kalkhawmte inlawmna thu sawiin  World Consumer Rights Day chu March 15th niin, hemi ni hian a lawmna hun hman ni lo mah se District Consumer Union hruaituten veng hrang hrangah dawr tlawh kualin bukna dik an hmang em tih leh man bituk (MRP) angin bungrua an hralh em tih an endik thu a sawi a, a lawmna hun hi  remchan zawkna avangin vawiinah hman a ni, a ti. 

Mizoram sawrkarin loneitute Sawhthing tharchhuah a leisak an dahna hmun Secondary Collection Centre, Siaha chu Consumer Union hruaituten an tlawh thu Pu Chawngkhuma Chawngthu chuan sawiin, sawrkar leikhawmsa leitu tura lo kal te'n district hrang hrang Sawhthing an leisak tawh chinah Siaha loneitute Sawhthing tharchhuah a faiin a thianghlim ber an tih thu an sawite chu Siaha district chhung mipui te chu an rintlak hle tih tarlangtu a ni a, chhawmnun zel a pawimawh a ni a ti bawk.  Siaha-a Consumer Club nung tha tak pathum – Government Saiha College, Government Higher Secondary School Siaha, Government ECM Higher Secondary School an awm mek tih a tarlang bawk.

Vawiin hun hmannaah hian sawrkar official, pawl (NGOs) hrang hrang hruaitute bakah Consumer Club memberte an tel a, zawhna leh chhanna hun hman niin Pu Lianchhuma Chinzah, District Civil Supply Officer in chhangin, lawmthu sawina a nei nghal a hun hman tihtawp a ni.