Vawiin chawhnu dar 1:00PM khan DC’s Conference Hall-ah Pu R.Zarzosanga IAS, District Bawrhsap leh Siaha District Fire Prevention Committee Chairman ni bawk kaihruaina hnuaiah Siaha District Fire Prevention Week hman dan tur relin committee member te an thukhawm.

Vawiin meeting-ah hian state level-a an lo rel thluk tawh angin, Huan hi march ni 10 ral hmaa hal vek ni se, Lo erawh March ni 15 aia tlai lo va hal vek ni se, tih a rel a ni a. He mi chungchanga mipuite hnena thiltul leh pawimawh inhrilhriatna chu LAD, MADC te lo bawhzui a tura rel a ni bawk. Kumin Fire Prevention Week opening Function hi ni 10th Feb, 2016-ah DC Conference Hall-ah neih ni se, Kangmei laka fimkhurna chungchanga zirtirna ziak tha Chanchinbu 3 hnenah lawmman pek ni bawk se. Fire Prevention Week pualin ni 9/2/2016 hian MarathonRrace buatsaih ni se, lawman 1-3 thleng siam sakin, ni 10-a opening function-ah sem nghal ni se, tih te rel tel a ni.

Kangmei laka an khaw ram humhim tha District chhunga Thingtlang khaw 3 leh District 3 te hnenah lawmman, 1-na tan Rs.50,000/-, 2-na----Rs.30,000/- leh 3-na-------Rs.20,000/- State level Fire prevention Committee in a lo rel thluk tawh te sawilan a ni a. Secretary, Siaha District Fire Prevention Committee chuan Nikum( 2013-2014)-a Lawmman te pawh tun thlenga an la dawn lo a vangin, an mahni sum lawmman dawng te hnenah an pek rih mai thu meeting hnenah a thlen bawk.

Secretary chuan nikumah March ni 15 hnu-ah Lo haltute thlalak leh Adrress kim chang chanchinbu a an tarlan avanga, Defamation case an awrh thu leh thiam an chan tak thu meeting hnenah thlenin, Kumin-ah pawh Lo hal Phal hun March ni 15 hnu lama lo hal an awm a ni chuan, an chunga Dan anga Action lak a ni mai piah lamah, an thlalak leh An nihna kimchang Chanchinbu-ah tarlan a nih eh dawn a ni, a ti bawk.

Secretary chuan Fire Prevention lama tan lak kan ngaih ziah tarlangin, Siaha district hi kum 2012-ah District ti tha ber- pakhatna lawmman kan dawnga, 2013-ah 2-na , 2014-ah 3-na Lawmman kan dawng chauh va,kum 2015-2016-ah chuan Pakhatna Lawmman lak ngei I tum ang u, tiin kalkhawmte a sawm hlawm a ni.