Vawiin hian Lawngtlai khawpui chawm tur tuilak hna kalpui mek Greater Lawngtlai Water Supply Project ah vawiin khan Pu Remsiama, Chief Engineer, PHE leh Pu VL Hmuaka CEM, LADC ho in hlawhtling taka pump chhin a ni.

Greater Lawngtlai Water Supply Scheme hnuai ah hian Chhimtuipui kam a Treatment Plan atangin Metres 760 a sang Pipe Meter 5928 a sei a zawm, Chawnhu tlanga tui Litres Nuai 5 dawng tuizem lian ah hlawhtling taka a pump chhoh a ni a, heta tang hian chhuk zawng vekin Zonal tank ah te thun luh tawh tur an ni a, Zonal Tank atang chuan in tin tan connection lak theih a ni leh dawn a ni. Treatment Plant hi Chhimtuipui atanga Meters 250 a sang ah bun a ni ve thunga, hemi inkar tuilak nan hian Pipe a lai hawlhtlang inches 11 meter 1010 zet hman a ni bawk.

Greater Lawngtlai Water Supply Scheme hi Ministry of DoNER hnuai ah Rs. 25,64,50,000/- senga thawh a ni a, he hna hi M/S Exelsior Merchants Pvt, Ltd. Kolkata ten an thawk a, ruahmanna ang chuan Electric chakna hmanga Pump tur leh a tul chang a Diesel hmanga pump ve chauh tura duan a ni a, tunah hian Electric hi la thlunluh fel loh deuh a nih avangin Diesel hmang Power-a pump chhin rih a ni. Greater Lawngtlai Water Supply Scheme hian Lawngtlai khawpui a mihring lo pung zel tur nen chhutin Kum 2040 thlengin nitin mipakhat tan tui litres 40 zel pe thei tur a chhut a ni.

Vawiin a tui pump enchhinna ah hian Pu Duhkima, SE PHE Lunglei Circle, Pu Ngentluanga, Sr. EE PHE, Lawngtlai Division, Pu Lallawmpuia Sawthly, SDO PHE Lawngtlai te bak ah LADC a Executive Member te leh Central YLA hruaitute an tel a ni.