Chapchar Kut chu kumin March ni 4 hian Aizawl Sipai Lammualah hman leh tura ruahmanna siam mek a ni a. Vawiin khan Art & Culture Director Pu R.Hmingthanzuala hovin Chapchar Kut Programme Committee chu a pisaah an thukhawm.

Chapchar Kut chu mipui huapzo thei ang bera hman anih theihna turin item hrang hrang thlanchhuah anih bakah, inbuatsaihna kal mekte sawiho a ni a. Mizo hnam lam, zai, Mizo rimawi chhepchher chi hrang hrangte, Mizo hnamzia pho lang thei tur lam thil hmuhnawm tak tak ngaihthlak leh en tur a awm dawn a ni. Kum danga Chapchar Kut hman tawh dante sawi chhuakin meeting hian ngaihtuahna uluk taka sengin kum dang aia tha zawka kut hman dan tur ruahmanna siam tha a ti a. Rawtna hrang hrang an neihte hi Chapchar Kut Organising Committee pawmpui tura chhawpchhuah a ni ang.

Chief Minister chairman-na hnuaia din Chapchar Kut Organising Committee chuan Kut hman dan tur chipchiar duang tur hian Programme Committee a din a. He Committee-ah hian SP Traffic, I&PR, Tourism, Art & Culture, CYMA, MJA leh MCO aiawhte bakah sawm bik mi pariat an tel a ni.