No.3976/2021-2022

Aizawl February ni 11 : Vawiin chawhnu dar 01:00Pm khan Siaha District Bawrhsap thar Pu Lalsangliana leh Siaha District MJA member te chu DC Conference Hall, Siaha ah inkawmna hun an hmang.

He hunah hian Bawrhsap Pu Lalsangliana chuan member kalkhawmte lawmna thu sawiin inkawmna hun neihpui tura a sawmna an ngaih pawimawh avangin lawmthu a sawi a ni. Bawrhsap chuan Siaha District-a a awm chhungin hmasawnna kaihhnawih hnathawh bakah mipui rawngbawl hna chu theihtawp a chhuah tur thu sawiin, District Administration hmalakna tur kawng hrang hrangah MJA member te chu thawhhopuiah a sawm a. Thawhhona tha in District hmasawnna kawngah rah duhawm a chhuah ngei a beisei thu sawiin, a tul hunah thurawn inpek hrehlo turin a chah hlawm bawk a ni. 

Pu Lalsangliana chuan mipui zirtirna leh khawtlang nun kaihhruaina kawngah chanchinbu mite mawhphurhna a san thu sawiin mipuiten thudik leh thu belhchian dawl an hriat theih nan thawk chhunzawm zel turin member kalkhawm te a chah a, thawhhona tha nena ke pen-a hma an lak chuan District tan rah tha a chhuah ngei a beisei thu a sawi bawk a ni.

Pu M.Baithai, President, Siaha District MJA chuan Bawrhsap thar lawmna thu sawiin, mipuiten an harsatna leh mamawhte mizo tawng ngeia an thlen theihna tur Bawrhsap thar an nei chu an thlamuanpui thu a sawi a. District mipuite pawhin an tangkaipui ngei a beisei thu sawiin Bawrhsap tharah chuan MJA leh mipuiten beiseina sang tak an neih thu a sawi a, MJA te chuan thawhhopui an inpeih reng a, theihtawp an chhuahpui tur thu a sawi bawk a ni.

Pu CZ. Hluna, General Secretary, MJA, Siaha chuan memberte inhmelhriattir-na hun hmangin Siaha District ah MJA member sawm leh pahnih (12) awm mekin chung zingah chuan Prominent Journalist mi pahnih (2) an awm mek thu a tarlang a ni.

He hunah hian Bawrhsap leh MJA memberte chuan Siaha District tana hmalakna tur hrang hrang leh ngaih pawimawh-a neih hmasak tur hrang hrangte an sawiho a, sawihona hun hman zawh hian Pu Abraham Beirazi Khithie, PD, DRDA, Siaha & Addl. DC, Siaha ni bawk chuan lawmthu sawiin hun a khar a ni.