1777/2024-2025

Siaha the 28th, August 2024: Nimin chawhnu dar 3 khan Legal Metrology, Mizoram Police leh Anti Tobacco Squad Siaha te chuan Siaha khawpui chhunga contraband Cigarettes zawrh an man khawmte chu DC Complex, Siaha-ah Deputy Commissioner, Pu VL. Hruaizela Khiangte, Chairman Anti Tobacco Squad, Siaha ni bawk chuan a tiral.

Pu VL. Hruaizela Khiangte chuan dan phal loha zawrh cigaratte hetiang zat man khawm a ni chu lawmawm a ti hle a, chhiah tha taka chawia zuar an awm laia chhiah pawh chawi lova thil zawrh a ni chu pawi a tih thu a sawi. Meizial zuk chu mihring tan a hrisel loh mai bakah a zu tu bula awm zu ve lote tan pawh a hrisel loh avangin nghei thei chuan nghei theuh tum tur a ni a, hetiang zozai man a ni hian mi tam tak nunna a chhan ngei ang tih  sawiin dan ang taka hma la chungin chhungkua, khawtlang leh ram tan thil tha tak a ni a ti bawk.  

Vawiina Vaihlo tihral/tichhiat te hi dawrkai pali (4) hnen atanga man niin tualchhung zawrhna rate-a chhutin Rs. 1,62,720.00 man hu a ni. Kum 2021 khan District Magistrate hriatpuiin Lawngtlai leh Siaha khawpui atanga man Valiant Cigarette leh Far Star Cigarette 4810 packets lai chu tichhiat a lo ni tawh bawk.

Cigarette tihchhiat zat chu a hnuaia mi ang hi a ni.  

1    Valiant Cigarette (V)    2112 packets

2    Far star Cigarette    600 packets

    TOTAL    2712 packets

He hun hi Pu R. Lalnghakliana, Assistant Controller, Legal Metrology, Siaha in a kaihruai a, vaihlo man a nih dan leh tiral tura dan fel tak a awm thu sawiin ‘Vaihlo (Cigarettes) te hi 21st March, 2024 a man daih tawh ni mah sela tiral tur chuan man atanga ni 60 ral hnuah phalna lak hmasak phawt a ngaih thu leh Controller, Legal Metrology, Aizawl in phalna a pek hnuah District Magistrate awmlai ngeia tihral tur a nih angin tun tumah pawh hian District Bawrhsap hovin tihralna hun hman a ni’ a ti. 

Vaihlo tihral hi environment friendly thei ang bera tiral tura thupek dawn a nih  angin a bawm atanga kheh vek hnuah khawl (sprayer) hmangin a zawp ral thleng tuia phuh huh vek a ni a, bawlhhlawh paihna hmunah paih nghal vek a ni.  

Pi S. Laltanpuii, District Consultant, District Tobacco Control Cell, Siaha chuan ‘Vaihlo atanga siam chhuah dona kawngah nasa lehzuala thawhho a tul thu sawiin, kan hnam min runtu langsar tak pakhat chu vaihlo a ni a, a do turin tu mah bang bik kan awm thei lo’ a ti. Hun hmang tura kal khawmte hnenah lawmthu sawina a neih bakah vaihlo tihralna (disposal of seized item) a kaihruai bawk.

Vawiina vaihlo tihralna hunah hian Pu C. Lalruatkima, Addl. SP, Dr. Lalnunziri, Sr. CMO, Pi S. Lalmuanpuii, Sr. LAO (MADC) Dr. Lalrengpuii Ralte, Deputy CMO bakah MJA Member te an tel a ni.