Vawiin chawhnu dar 3:00Pm khan Pu Bhupesh Chaudhary IAS, Deputy Commissioner, Siaha chuan Aganwadi Centre Building RCC a sak, College Vaih-II a mi chu a hawng.

Pu Bhupesh Chaudhary, IAS chuan thu sawiin; Aganwadi Centre hi Naupang, nu naupai mek te leh nau pawmte tan a eitur tha pekna hmun a nih ti hria a, hlut thiam vek turin mipui kal khawmte a chah a. Nausen, naupang leh nu an hrisel that chuan mihring hrisel leh society hrisel kan nei dawn a ni. Chuvangin kan khawtlang hruaitu VC te, tlawmngai pawl te leh mipui mimir te pawhin i enkawlpui theuh ang u, a ti.

He hunah hian VCP College Vaih pawhin thu sawiin; Anganwadi Centre building hi ICDS leh NREGS convergence hnuai a sak niin; kum 2017 a tang a sak tan tawh kha a ni, a ti. Rokhawlhna avang a sak zawh loh leh khawih chhunzawm loh a awm reng chu kum 2019, August thla a tang khan BDO Siaha rem hriatna a sak chhunzawm leh a ni a, tunah luah theih a sak zawh a lo ni ta a ni, tiin lawmthu a sawi.

He Anganwadi centre building hawnna hun hi Pu Ngulzathuama MCS, BDO, Siaha RD Block in kaihruaiin, Pu H. Zonunmawia MCS, Election Officer, Pu Fela CDPO, Pu PP Zalena, President MTP Hqrs leh Pu C.Beikhochhi, President MSO Hqrs te pawhin thu sawina hun an hmang bawk.