No.4096/2021-2022

Aizawl; the 24th February,2022: Siaha district Bawrhsap Pu Lalsangliana chuan Rajya Sabha MP Pu K. Vanlalvena'n Sansad Adarhs Gram Yojana(SAGY) Model Village atana a thlan PHURA khua tlawhin,  Phura Khua chu SAGY Model Village atana hawngin, SAGY Model Village chungchang inzirtirna Orientation Programme buatsaih pawh khuallian niin a chhim nghal bawk.

Pu Lalsangliana chuan Phura khua Model Village atana Pu K.Vanlalvena, MP (RS)in a thlan chu Phura khaw mipui te a lawmpui thu sawiin,  Model village a thlanchhuah khua te hi khawdang aia duhsak leh vur bik tura thlanchhuah ni lovin, khawdang te entawn tura kawng engkima Sawrkarin hmasawnna rahbi tuk nana scheme hrang hrang leh ruahmanna a siam te chu sawrkar official leh khaw mipui te nena thawhhona tha leh  inkaihruaina tha tak nena langtlang taka  kalpuina khua ni tur leh  khaw dangte entawn tlak khua ni tura thlan chhuah khua a ni zawk a. Phura khaw mipui pawhin Model village a tana thlanchhuah an nih chhan hre reng a, Model village ni tlak renga mawi leh tha khua ni tura in inpuahchah a tul dawn a, chumi atan chuan duhsakna ka hlan che u a, in harsatna leh mamawh te chu inthlahrung lovin Kei leh SAGY charge officer hnenah in thlen thin dawn ni a, tiin Phura khua mipui a chah bawk.

SAGY Model Village hawnna programme hi Pu Khochai VCP, Phura South in kaihhruaiin, Pu Lalhmingliana, SDO(C), Tipa leh SAGY Charge officer ni bawk chuan SAGY Model village chungchang sawifiahna hun a hmang a. Line department hrang hrang ten an hmalak tawhna leh hmachhawp te report an pe bawk a ni.

Programme kar lakah zaithiam tak tak ten zaiin mipui an awi reng bawk. Pu Beiryrao, VCP, Phura North in lawmthu sawina in vawiin programme hi a khar ta a ni.